25 buba NWA tournament atema renemshir

Kohima, October 18 (TYO): Nagaland Wrestling Association (NWA) tenzüker küm 25 ajungba benjung asoshi kanga mazüngi renemtepdar, ta NWA sangdong ka ajanga ashi.
NWA Tir, Neikhrolo Khalo-i, “25buba NWA tournament March, 2016 nung akatsü sentong lir, ta Hotel Vivor nung osangbenertem den jembidang ashi.
“Iba sentong takok ngua agitettsü asoshi onok terenemba tulu lir aser tesüiba mapang MLA, Nuzota Swuro, Er. Toba aser Heirang Lungalung nunger organising committee, Finance Committee aser souvenir committee nung Convenor tem asütsü loktii shimtetogo,” ta pai shisem.
25 buba NWA tournament nung takok angur nem sen lakh 5 senpet agütsütsü aser iba senpet ya tang tashi nung Nagaland nung saisapong senpet rongnung timtiba lir. Angami, Chakhesang aser Zeliang kin nungi dang masü saka Nagaland nung aliba tanga kintem danga ‘wrestling association’ tenzüka iba sentong nung shilem agitsü asoshi NWA-i metetdaktsüogo.
Taoba mapang takok ngua alirtema iba sentong nung shilem agitsü asoshi jaokogo.
NWA Tatong Tir, Neivikolie Khatsu-i, iba sentong asoshi jilia renemshiba sentong ka November 7 nü Phezu, Jotsoma nung akatsü. Jilia amungba sentong ya Jotsoma Village Sports Association-i ayonga amungtsü aser sentong amungba temaitsü lung ka azüngtsü.
Iba sentong nung Minister for Social welfare Kiyanilie Peseyie tongti tesemdanger asütsü.
Iba dak sentakba nung www.nagalandwrestlingassociation.org website ajanga tali rajema metetpelatettsü.