Mongoya MLA Merentoshi R Jamir densema NPF Mokokchung Division tir Moasangba Jamiri 25 Mongoya A/C kimen mesemtetba temaitsü wako atsüketa yutsür külem NPF party nung lennirtem den külemi tangokba noksa nung angur. Mokokchung, Oct 24, 2015
Mokokchung, Oct 24 (TYO): Honibarnü 25 Mongoya Assembly Constituency pur kimen mesemba den ketdangpur tasen shimertem tenangzükba agiba sentong ka agiogo.
Iba sentong nung 25 Mongoya MLA Merentoshi densema NPF Mokokchung Division tir Wb. Moasangba Jamiri kimen mesemba temaitsü NPF wako atsüketa yutsüba den ketdangpur tasen shimertem tenangzükba agitsü.
NPF Mokokchung Division tir Moasangbai iba sentong nung jembidang, tanü party nung tanishir aginer aika kümogo, aji saka, aika dak tanishir asütsü yimya maket, aji oda, tanishir ka dakji khuret angatetba, pei tebilemba shitetba, taremzük akaba aser mapa agi sayutetba item noklemtemji alitsü nüngdaker ta tayongzükba ka agütsü.
Sentong nung 25 Mongoya MLA, Merentoshi R Jamiria mapang tatsüka agia jembidang, I. Bendangtoshi Jamiri Kimen asütsü agizükba asoshi pelaba den tanü nungi Mongoya nung otsü tasen ka tenzüker ta mezüngbuba oki ala.
Aji oda, “asenoki iba kimen ya mashimashi masü saka akhümtsübua aser meshiteta amshidi, kechiyong asenoki ibai junga mamshitetra temoatsü matentsü” ta paisa ashi.
Tanü ano ketdangpur shirnoksa tenangzükba agiogo, ibai nisung tsüngdang dang masü saka Tsüngrem tsüngdang tenangzükba agir amato bilema party nükjidong shitak amer maparen ajak inyaka aotsü asoshi paisa ayongzük.
Taoba mapang koba party telungtet nung mapetmesü adokogo, ibaji asenoki amadoker lungjemer aotsü telemtetba agiba ama tarutsü nükla dak rangloker iba tangatetba nungji maneni aotsü paisa ashi.
Nüburtemi 25 Mongoya A/C ya tashi tait constituency ka ta züngshir aser nükshia repranger, anungji, asenoki tatishitsü tajung sayutettsüsa party tenzüker ajaki inyakdaktsüner ta paisa ayongzüka liasü.
25 Mongoya A/C pur kimen asütsü Mokokchung town kübok Majakong Ward nung alir I. Bendangtoshi Jamir shim. Iba den ano 25 Mongoya A/C NPF general office den ano lenla ajak nungi ketdangpur shima tenangzükba agiogo.
Tanü iba sentong nung NPF Mokokchung Division den NPF central office nungi ketdangpur, Mongoya CEC member aser Mongoya A/C kübok unit balala nungi ketdangpurtem arua shilem agia aden.
You must be logged in to post a comment Login