25 Mongoya Congress Party (ACCC) asentenshia tenzüker

Mokokchung, January 03(TYO): December 26, 2018 nü Nagaland Pradesh Congress Committee (NPCC) General Secretary, Lanutemjen’er kidang senden ka mena 25 Mongoya Assembly Constituency Congress Committee tanaben asentenshia bener aotsü asoshi telemtetba agiogo.
Iba senden nung NPCC General Secretary, Lanutemjen-i jembidang, BJP-i aniba NDA sorkari nübur aginüba ama mesüi yimsü asüba ajanga nüburtemi laktetogo, ibayongji India nung state aika nung Congress lenisüba nung sorkar küma odar, ta metetdaktsü.
2019 general election nunga Congress-i aniba sorkar arutsü nükjidong yur Indian National Congress tir, Rahul Gandhi lenisüba kübok kanga meranga inyakdar, anungji taruba sorkar-jibo Congress-i anir akümtsü imlar, ta pai ashi.
BJP-i küm pongu yimsü asüdang, Khristian pur kanga reshikangshiogo, Congress mapangbo iba ama reshikangshiba kangabo maliasü, anungji Khristian pur atema BJP ya khenyongi mapet, ta paisa ashi.
Congress Party-i dang jenjang balala nung alir ajak mebendangi sakuku süa liteter aser Congress-i dang tekübok jenjang nung alirtem atema mapa balala inyaker aser tarutsü lanurtem jenjanga yanglutsür, ta paisa ashi.
Naga People’s Front (NPF)-i küm 15 tashi state nung yimsü süogo, saka parnoki Naga nunger taginüba kecha mataloktsü aser par yimsüsüba mapang menden raktepdang rongsen jenti laluba den nüburtem atema terenlok mapa kecha meinyak, ta paisa NPF party aitsü.
Tang NDPP o BJP na külem sür state nung sorkar bener aor, aji saka, NDPP ya tamendakdak makaba party ka asünung, BJP indang remote control amai telemtetba ajak BJP-i dang agir, NDPP ya BJP indang khu abener ka dang mesüka lir, kechiyong BJP-i telemtetba kechi agidir iba nungji parnoka adener, anungji iba sorkar ya junga moutettsü amai bilemer, ta paisa ashi.
Nagaland nung yimtenren party balala aika liaka itemji kata asenok asoshi mapet, Congress-i ang Naga nunger atema khuret süa bilemer aser Naga nunger taginübajibo Congress Party-i dang meteta lir, aser Congress-i dang Naga nunger Political Solution-ji bener arutsütettsü, ta pai ashi.
Congress Party ya dang Naga nunger asoshi teimla akaba party ka lir, anungji lanurtemi iba party nung arua adentsü asoshi paisa ayongzüka liasü.
25 Mongoya ACCC anitsü atema Wb. Temjenlepzük (Chuchuyimpang) tir shimogo aser pa lenisüba kübok takaratiba nung frontal ajak tentetyonga aotsü telemtetba agia liasü.
Iba senden nung Congress party meimer tan-tambui anir lanurtem aika arua Congress party asentenshia aotsüba onük dak sentakba nung shilem balala agia liasü.