25 Mongoya NPF party pur angatettepogo

Mokokchung, September 16 (TYO): Sept. 16 Bodbarnü MLA Merentoshi R Jamiri ayongzüka par kidang 25 Mongoya Assembly Constituency NPF party pur telungjem lokti senden ka takok ngua liogo.
Iba senden nungji tongtibangsa Naga People’s Front nung lennirtem tsüngda mangatettep adoker mapang tatsüka mesüngjemteti lia aru saka ajakji angatettepogo.
Aji oda, party pur tsüngda tangatettep tajung kati arua jembiteper külen April 30, 2015 nü, NPF Lokti Mungdang Kohima nung alidang, NPF President Dr. Shurhozelie ajanga NPF party lungjemer (reconciliation asür) ta sangdong. Iba dak ajemdaker Bodbarnü MLA Merentoshi R Jamiri ayongzüka par kidang 25 Mongoya Assembly Constituency NPF party pur lokti telungjem senden takok ngua agiogo.
Iba senden nung Merentoshi R Jamiri jembidang, “tesüibaji süiadokogo, tejen otsütem asoshi kati ka dang taitoktepdi, joko asenoki tarutsü nükla dak rangloker party tashi ita odi” ta tayongzüka ka agütsü.
Iba senden nung tesüiba mapang NPF party pur tsüngda pei telok asoshi takok asaa inyaka arudang, aibelena inyakbatem asoshi taitokteper Mongoya NPF party ka küma lungjemer aotsü lemtetogo.
Iba senden nung NPF Central ketdangsertem aser Mokokchung NPF Division nungi President Wb. Moasangba Jamiri anir Division ketdangpurtem densema liasü aser tang nungi Mongoya nung NPF party tashi iita aotsü telemtetba tajung agia liasü.
Ano tang nungi NPF President Dr. Shurhozelie, Nagaland Chief Minister T.R Zeliang aser MLA Merentoshi R Jamir parnok leniba kübok NPF party asoshi maneni bendanga agüja inyaktsü telemtetba ka agiogo.
Iba sentong nung NPF Central Office vice-president Aolepden menden asü. NPF CEC zungsem, Aochuba aser Mokokchung Division NPF Advisor, Aoshianang tenatia o tatsütsü jembi. NPF Mokokchung Division president, Moasangba Jamiri NPF party khuret aser teinyaktsü (responsibility & duties) indang lemsatep.