NCRCYF-i Longkhüm yimtak ayongba ‘free medical camp’ sentong takok ngua agir külen doctor-tem, Longkhüm Village Council Chairman Sentonglemba, teyariteper aser tayongertem külemi yimkong kilem nung tangokba noksa nung angur.  Longkhüm, May 28, 2016

Longkhüm, May 28 (TYO): Nagaland Christian Revival Church Youth Fellowship (NCRCYF)-i ayongzüka Longkhüm yimtak nüburtem nem angati temang reprangba ‘free medical camp’ sentong tajung ka ayongzüka kaogo. Iba sentong nung tanur tain noklang pezü shi temang angati reprangba den terepranger shia nem mozü angati lema agütsü.
Iba camp nung doctor-temji Dr. Takosünep, Dr. Ayangla Saku, Dr. Sentila, Dr. Limanaro, Dr. Arenla, Dr. Asenla, Dr. Alemba, Dr. Sütsüngkokla, Dr. Lorung nungertem liasü. Iba den ano tenük repranger Ophthalmic Assistant Sangyula aser Tiamongla na densema liasü.
Iba medical camp ya tongtibangsa Nagaland Christian Revival Church Youth Fellowship (Longkhüm) tenzüker 2017 küm hon jubilee amungtsüba lir, iba nüngtem nung aser nüburtem anema aliba jenjang ajungkettsü nükjidong yur ibai ayongzükba lir, ta NCRC Pastor Zülu Sor-i osang zülurtem den jembidang metetdaktsü.
Longkhüm yimtak iba ama “free medical camp” ya taoba küm ter (10) tejakdang lir külenbo tang aliba ya dang asütsü, anungji, iba ya ajanga nüburtem anema aliba tsütsü tajangzük tulu angutsü imlar, ta medical camp-i arur senso ka den jembidang pai ashi.
Iba sentong takok angutsü asoshi shilem agir doctor-tem den Ophthalmic Asst, PHC Longkhüm medical officer Dr. Sentila aser teyariteper ajak dang tayongertemi pelaba metetdaktsü.