Jembitepba ajanga SCS ken o bentettsü ajungshir: Kerry

Beijing nung tentetba Diaoyutai State Guesthouse nung amenba US-China Strategic & Economic Dialgoue senden den sentaktepa amenba Strategic Track session nung US Secretary of State, John Kerry (Abelen)-i China State Councilor, Yang Jiechi (Achijilen) den jembiba noksa ka yangi angur. (Beijing, June 06)

 Beijing, June 06 (Agencies): China aser kidangsüa aliba Asia-Pacific linüktemi jembitepba senden amenba ajanga parnok rong nung adokba South China Sea (SCS) den sentakba mangatettep ken o bentettsü tajungshiba olen ka US Secretary of State, John Kerry-i tanü, Hombar nü metetdaktsüogo.

Kümshia amenba 8 buba US-China Strategic & Economic Dialogue senden Beijing yimtiba nung amen tenzükba sentong nung o jembia shilem agidang Kerry-i tanü iba olenji metetdaktsü.

SCS tzüyim shilem tuluba ka par meyong ta züngshia, China-i SCS nung asetkong tenteta par mitkar tashi tali itshitsü mapatong kanga sashia inyaktsü tenzüka lir aser par linüki yamaji inyakba ajanga kidangsüa aliba Taiwan, Vietnam, Philippines, Brunei aser Indonesia linüktem jashidakja lir.

Totzü aser gas tashi jenti angudak, SCS ajangdanga dollar sen trillion 5 shi jenjang aketba osettsüset kümshi rongtem nung abenba osang bushiteta lir aser iba yongji, SCS ya alima atema tongti shishilembatsü tzüyim lenmang ka akümer.

Ano külen, US-i par mitkar tayimtsü yoka mangatettep adokba SCS nung miim osangtem agiba atema jashia, China-i iba tzüyim tesem nung Air Defense Identification Zone tentettsü sentong renemba osang angazükogo.

Iba mitkar osetji asangsang nung amenokra, SCS ajangdanga ayimba tayimtsü ajungai kasa tesem ajangdanga ayimtsü asoshi China nungi temela agitsüsa akümtsü.

Ajisüaka, yamaji inyakbaji rara menatsü maparen aser tensa mejungi kümdaktsütsü sentong aliba olen ka Kerry-i Mongolia nung yashi, Deobar nü anenzükdang metetdaktsüogo.

Ano, Beijing aser Washington na tsüngda tesendaktep tajungba kümdaktsütsü asoshi par linük ana tsüngda amaliteptsürena tajungba küma yanglushitsü onük ka Kerry-i tanü senden nung benokba osang jangjaogo.

“Korean peninsula nung tensa tajungba kümdaktsütsü atema North Korea-i tenzükba tongpang nung amshitsü nuclear osettsüset yanglua kasaji tendangba maparena anentsütsü nungdaker,” ta pai tanü lemsatepa liasü.

“China aser US na tsüngda adokba mangatettep ken o ajunga yimya tajungtiba nung benetettsü aser yamaji inyakba ajanga linük ana prongla nem tajangzük bener arutsütsü,” ta China Tir, Xi Jinping-ia tanü senden lapoktsüdang metetdaktsü.