26buba Loyem Memorial Trophy Sangzi FC aser Nyenshen FC na final asayatsü

Tuensang, Mongputeni/October 31 (TYO): Loyem Memorial Ground nung Sangtennü tanabuba semifinal asaya nung Sangzi FC-i goal 7-0 agi DEF Tsg madak takok ngua final tongtetogo.
Asaya mezüngbuba shilem nung Jonny-i hat-trick agütsüba aser asaya tanabuba shilem nung Kheto teyari nung parnoki asaya koka final tongtetogo
DEF Tsg pur tia tamajungba kümdakja minute 26buba nung Liyanthung nem yellow card tanabuba agüja asaya nungi tugudaktsü aser parnok asaya 10-i dang asayatsüsa aküm.
Asaya nung mezüngbuba goal ya Jonny-i minute 13buba nung idaktsü aser iba sülen minute ka lir tanabuba idaktsü. Maneni pai minute 26buba nung goal tasembuba idakja hat-trick ka agütsü. Iba sülen asaya mezüngbuba shilem nung Samuel (40′) aser Awangbo (43′) natia goal kaka idakja goal 5-0 nung tembang. Iba sülen asaya tanabuba shilem nung Kheto-i minute 67 aser 80buba nung goal ana idakja parnoki asaya ayong ayonga kokogo.
Anogo ka sülen Sangzi FC aser Nyenshen FC na Yimpoksüi/Nov 2 nü 1:00 nungi tenzüka final asayatsü.
Kasa mapang nung asayamung ayongertemi Yangtepnü exhibition match asem asayatsü asoshi renema lir.
Asaya ajungketba den exhibition match tem ya Confederation of Chang Students Union (CCSU) indang project ana; “Mission Zero% Free” aser “Mission Wesen” atema sen aatsü atema ayongogo.
“Mission Wesen” ya yimtsüng nung aliba school tem nung education jenjang ajungkettsü nükjidong nung tenzük. Küm shia inyakyim asadangba, tesayur aser tsürabur tesendaktep yanglushiba, kaketshirtem nem teyari agütsütsü asoshi tsüraburtem nem tangazükba agütsüba aser school tajungtiba asem aser kaketshir tajungtiba asem tushiba amala maparentem iba sentong kübok ayimjema inyaker. Iba sentong mezüngbuba phase nung yimtsüng 12 bo ayimjemogo.
District Education Office den longjemer CCSU puri ‘Mission Zero% Free’ sentong Rongjui/September 15, 2017 nung tenzükogo. CCSU puri achaayanga High Schools nung azünger ajak nem Residential Coaching agütsür. Iba sentong ya yimdak yimtsüngtem nungi class 10 nung azünger kaketshirtem nem teyari balala agüja tatidang ajangdaktsütsü nükjidong yur inyaker. Iba sentong ajanga Government High School ti ajangzüktsü.
Exhibition asayatem yamai alitsü:
Yimpoksüi/November 1
Mapang: 11: 00 ako nungi.
1buba asaya”
DC XI vs Veteran FC, Tuensang
2buba asaya:
LMT Organising vs MUSCN, Tuensang Unit
3buba asaya
Pastor’s Union , Tuensang vs Chang Union Dimapur