26buba MTBA Youth Dept Music Fest meraketa tenzükogo

Mokokchung, July 13 (TYO): Mokokchung Town Baptist Arogo Youth Department-i ayongzükba 26 buba ‘Music Festival 2017’ sentong “Tepela Olatem: Tenüngsang Ken 51:8” omen nung ajemdaker July 13 aonung yangi MTBA sentep kidang meraketa tenzükogo.
Ana aonung agitsüba sentong nung choral, musical comedy, ensembles, instrumentalist, Naga folk fusion den ano kentener kija aser telok balalai shilem agidar aser agitsü renema lir. Mezüng aonung Tzüsapang Youth dept, Alcoholic Anonymous, Kumlong Youth dept, Beyond Sunday, Yimjung Ola den ano MTBA kübok fellowship balala nungi kija aser teloktemi shilem balala agia Tsüngrem tenüng sanga liasü.
July 14 (Hogulbar) aonung 6:00 ako nungi iba kenten sentong akatsü aser iba aonung Rag Dolls, Mingle Tones, Artang Youth dept, Ungma Youth dept aser MTBA lanurtem den ano fellowship balala nungi kija aser telok kentenertemi shilem agitsü sentong tarensen lir. Iba sentong ya angati dang alitsü, anungji, tejangrar ajak arua temoatsü agitsü asoshi MTBA YD tir Temsutoshi Lkri ayongzüka ashi.
‘Music Fest’ tenzükba otsü tatsüka:
Atangji, MTBA lanurtemi ayongba “Music Fest” tenzükba otsü ya jangratemtsü aser temenungratsüka. 1991 küm Ao Baptist Arogo Mungdang (ABAM) central council akadang, Ao Christian Youth Endeavour (ACYE) ajanga bangzüng ka renem. Iba bangzüngji 1992 ACYE Centenary amungtsü atema CYE ajaki Fund Raising Project kaka inyaker iba nungi aatetba senji ACYE dangi yoktsüba indang liasü.
Iba mapangji MTBA CYE ketdangpurtemji; I. Sashi Lkr Longkhum (tir), Lanuzülu Süngratsü (Tatong tir), Imtipokyim Khar (tongti zülur) aser Lanurenla Meküli (repsem zülur) par pezü liasü. Parnok lenisüba kübok Fund Raising Project-ji kechi inyak nung ajungtsü ta terataba tulu nung jembitepa aru. Kechiaser iba mapang Mokokchung tensa tia mejungi aliba ajanga concert/talent nite amala sentong ayongzüka akatsü sorkar bangdak amertemi tenokdangba agütsür liasü.
Aji oda, talangka jembitepa or tatem nung tenla kidang aonung ana/asem kenten benjong ka ayongzüka akatsü aser temulunger tenla sarutsü bangjemtep. Iba kenten benjong ya I.Sashi Lkr atepzüng nung aso, ta otsü ajanga angazüker.
Par mapang iba kenten benjong ya tongtibangsa nükjidong ana nung ajemdaker ayongzüktsü lemtet. Mezüngbuba nung ACYE Centenary Fund Raising Project inyaktsü aser tanabubaji; kenten sempet aketer lanurtem ajungmesoa pei sempet sayudak sabang peria lapoktsütsü nükla nung tenzük, ta MTBA YD tir Temsütoshi den iba osangbeneri jembidang pai ashi.
M-Fest ajanga lanur musician tajung aika adokogo:
Taoba lenirtemi nükla tulu yur tenzükba ama, iba sentong küm 25 tashi ayonga akadang iba sabang nungi lanur aika pei sempet meteta kija, telok aser musician tajung aika adokogo, ano tarutsü nunga maneni adoktsü imlar, ta Temsütoshiisa ashi.
‘Music Fest’ tenüng ya taoba MTBA CYE tir I.Temsü Jamiri jatsü aser Music Fest logo ya O. Moa Imsong shiba iba mapang Music Club nung tanishir liasü, pai design sütsüba lir. Mezüngbuba Music Fest-ji 1992 küm asem aonung tashi ayonga aka. Iba mapang nungi tenzüka iba benjong ya kümshi amunger aser taküm agi küm 26 buba ayongzüka akar, ta Temsütoshiisa ashi.
Arogo aika nung tanü amai kenten benjong ya bulua maliasü. MTBA Youth Dept-i ayongba Music Fest benjong ya kenten sentong tejentiba rongnung ka asütsü. Iba ya tenzüker külen arogo aika nung kenten benjong balala tenzükyonga aoba angur.
Iba kenten benjong nung MTBA arogopur dang masü saka Mokokchung town aser temeket arogo balala nungi tejangrar lanu-tain aika arua adener. Iba den ano taoba küm ishika jakdang nungi iba kenten benjong ya Mokokchung Channel nunga sayua arudaki.