26buba Naga Style Wrestling Metsüremi 14 nungi tenzüktsü

Kohima, Metsüremi 10 (TYO): Nagaland Wrestling Association (NWA) puri ayongzükba 26buba Naga Style Wrestling, 12buba Senior aser 4buba Junior Freestyle Meet Kohima Local Ground nung Metsüremi (March) 14 aser 15 nü asayatsü.
Taoba NWA tir Keku Zeliang asayamung lapokba sentong nung tesemdanger asütsü aser tatembangbuba anogo nung Chief Minister Neiphiu Rio tongti tesemdanger asütsü.
Iba asayamung nung Tenyimi community; Angami, Chakhesang aser Zeliang nungi asayar ajak agi parnok 54-i shilem agitsü. Asayamung free style asaya nung tetsür aser tebur na prongla atema weight categories pongu alitsü aser Under 17 junior tetsür aser tebur atema weight category 10 alitsü, ta NWA tir Neivikuolie Khatsu-i osangbenertem den sensaksemba mapang nung metetdaktsü.
Paisa ashiba agi, taküm Naga style wrestling atema sempet sen timba küma ajungkettsüogo. Champion nem sempet sen lakh 1.8 agüja aliba takümbo sen lakh 3 agütsütsü aser iba sülen tanabuba jenjang nem sen lakh 2 aser tasembuba nem sen lakh 1, pezübuba nem 80,000 aser quarter final nung tamakok angurnem sen 20,000 agütsütsü. Free-style senior tetsür aser tebur asaya nung champion nem senpet sen 10,000, tanabuba jenjang nung tembanger nem sen 7,000 agütsütsü, kasa mapang nung junior category champion nem senpet sen 7,000 aser tanabuba nem sen 5,000 agütsütsü. Paisa ashiba agi, junior asayartemi parnok indang aadhar card, birth certificate aser tawa tangokba passport agütsütsü nüngdaker.
Free-style asaya nung NWA unit asem dak alaka Wrestling Academy balala nungi melangtepertemia shilem agitsü.
Maneni Khatsu-i ashiba agi, taoba küm ama masü saka free-style wrestling asaya ajungkettsü atema asayamung mezüngbuba anogo nung free style asaya dang asayatsü aser Naga style Metsüremi 15 nü 9:00 ako nungi tenzüka asayatsü.