NSCN-IM tir Wb. Isak Chishi Swu alima nungi pilaogo

New Delhi nung NSCN-IM lenir Isak Swu mang anasa NSCN-IM lenir Th.Muivah aser Lok Sabha MP Neiphiu Rio na nokdaka angur.

Dimapur, June 28 (TYO) : Naga yimten nüchiso bushir telok Nationalist Socialist Council of Nagalim (NSCN-IM) nung tir Wb. Isak Chishi Swu tanü Mongolbar nü New Delhi nung Fortis Hospital nung shiranga monga lia anüngdang 12.40 ako shi nung pa arishi tembangogo. Pa arishi küm 87 liasü.
Pa ya temang mejungi kümer taoba küm nungi kasa mozü kidangji anepalua liasü. Iba osang zülu tashi nung pa temang ya June 30 nüang Nagaland-i bener arutsü asoshi sentong renemtepa liasü.
Naga yimtenren nung Shillong Accord yangluba sülen Naga nüchiso bushir telok Naga National Council (NNC) nungi 1980 küm razüka NSCN aküm aser yangji  Wb. Isak Swu tir aser  Wb.Thuingaleng Muivah tongti zülur aküm. Ajisüaka, ano 1988 küm NSCN teloka ana aküm. Iba sülen India den dang masü saka Naga nunger linük tenzüker telok balala tsüngda kanga azü tokshitepa tsükchitepba mapang tamajung aiben Naga nungertgemi ajuruogo.
Mapang talangka India den Naga yimten nüchiso atema raraa arur, 1997 küm NSCN-IM o India sorkar na tsüngda yimjung lapoka yimten ken o jembitsü tenzük. Iba küm nung jagi tang tashi maneni yimjung nung Naga yimten ken o jembia arudagi.
Asür Isak Chishi Swu taküm lia pai aniba NSCN teloki Naga yimten telatetba ka dangi arutsü asoshi India den ken o renemba tesüsabubaji 2015 küm August 3 nü “Framework agreement” yangluba liasü. Iba tangatettep ken o yangluba ajanga Nagaland nung teti asoshi yimjung arutsü imlar ta ato kilonser Wb.Narendra Modi-i metetdakja liasü.
Iba tangatettep onük ya India Prime Minister kidang prime minister Narendra Modi, Home Minister Rajnath Singh aser National Security Adviser Ajit Doval lia Muivah aser India sorkar tenüng nung jembir R N Ravi nati sign süa liasü. Iba ken o ya yimjung nung India o NSCN na küm 16 tashi agia senden 80 ben tashi nung Naga yimten ken o jembia arur renemba liasü.
Asür Wb.Isak Swu ya 1950s nung Naga National Council (NNC) nung tadong tir makümdang Foreign Secretary liasü. Pa ya  Chishilimi yimtak 1929 küm aso aser Government High School, Kohima nung zünger  St Anthony’s College, Shillong nungi graduate asü.
Pa kinungtsü Khulu den par jabaso 5 aser jala ka den semchir 2 toktsür alima nungi pilar.
NSCN-IM tir Wb.Isak Chisi Swu asüba osang angashia ato kilonser Narendra Modi, Congress tir Wt.Sonia Gandhi, Nagaland angh P.B.Acharya, Odisha angh Wb. Dr.S.C.Jamir,  Forum for Naga Reconciliation, Nagaland Speaker Wb.Chotisuh Sazo, NPCC tir Wb.K.Therie aser Business Association of Nagas nungertemi tesasaba aser mangyim jashi lemsatepba osang metetdaktsüogo.

Lt. Issac Swu den asüpila sentep sentong yamai alitsü :
1.     NSCN-IM mendenbuba Late Issac Chishi Swu den asüpila sentep sentongka Nagaland House, Aurangzeb Road  nung 29th June 2016 nikongdang  5:00 PM nung alitsü.
2.    Asür Isak  Swu mang Dimapur June  30, 2016 anüngdang 12:00 ako nung atongtsü.
3.     July 1, 2016 nü Hebron nung State condolence service alitsü.
4.     July 2 nü pa mang par yim Chishilimi (Zunebohto Dist)-i bener oagi yangji aremtsü.