28buba NASA-C saisapong Tsiesema nung tenzükogo

Dimapur, Aenjeti/January 22 (TYO): Anogo asem asayatsü aliba Northern Angami Sports Association (NASA) Group C asayamung tanü Kohima district kübok Tsiesema yimtsüng ground nung Tsiesema Village Sports Association-i ayongzüka tenzükogo.
NASA-C kübok yimtsüng 12 aliba nungi yimtsüng teku; Tsiesema, Chüziema, Meriema, Tsiese Basa, Zhadima, Nerhema, Nerhe Model, Viphoma aser Phekerkriema iba asayamung nung shilem agidar. Asayamung nung tebur football, tetsür aser tebur volleyball asayatsü, koba Brehostibarnü tembangtsü.
Asayamung lapoka sentong nung Chief Minister, PS Neiketouzo Kengurüse tetushi tesemdanger ama arua aden. O jembidang pai, lanurtem dang saisapong balala nung temulung agüja asayatsü aser parnok tejangraba aser temang dak apet asaya shima asayatsü ajungshi, aji asünungdang regional, national aser international jenjang nung parnok meteta akümtsü.
Chief minister Neiphiu Rio lenisüba kübok state sorkari state nung saisapong ajungkettsü merangba indang metetdakja pai lanurtem dang tejakleni arua sorkari agütsüba maongka balala bushi agitsü ajungshi. Paisa stakeholders tem dang sempet aketba lanur asayartem bushia aotsü mepeishiba den parnoki teyari agütsüba ajanga item lanurtem career aser asayar ka maitsü ajungkettsü ta ashi.
Kengurüse-isa, Chiephobozou nung January 31 nü nungi tenzüka February 2 nü tashi asayatsü aliba NASA asayamung nung NASA-C team-i shilem tajung agiba reprangtsü yongyaa ataba metetdaktsü.
Asayamung lapokba sentong ya NASA- C vice president So-u Yhor lenisüba kübok aka aser TVYSO tir Zhavilhou Yhor-i lokti pelaa agizükba o jembi. NASA-C tir Keneilhoulie Theünuo-i tir o jembi aser NASA- C games secretary Zakietuolie Khrodi lenisüba kübok asayamung nung shilem agiba team tem tenangzüktepba agi.