2buba CNCCI Executive Council Meeting kaogo

Dimapur, Yimpoksüi/November 29 (TYO): Yimpoksüi/Nov 28, 2018 nü Hotel Saramati, Dimapur nung 2buba Confederation of Nagaland Chamber of Commerce and Industry (CNCCI) Executive Council Meeting kaogo. Executive Council Meeting nung District Chamber of Commerce & Industry ajak nungi züngsemtem arua denogo.
Iba senden ya interim president asür Hokivi Chishi aser CNCCI Joint Secretary asür Tovi Kiba nem ola madoki minute ka akhüm agüja tenzük.
Sentong nung temoatsü meshizüka Mokokchung Chamber of Commerce and Industry nungi Yimtisunep Ao-i sarasadem. Mendenbuba Dr. Khekugha Muru lokti pelaa agizükba o jembiba mapang district ajak nungi züngsemtemi parnok mapang agüja iba senden nung arua adenba atema parnok tenüng asang. Paisa, parnok arua adenba ajanga Nagaland nung business community-i arok nükjidong ka asoshi bendanga agüja inyakba sayur, ta ashi.
Senden nung General Secretary, Dr, Seyievilie Mor-i CNCCI inyakyim tem metetdaktsü aser iba sülen District Chamber of Commerce and Industry ajak nungi o tatsütsü jembia liasü aser parnoki CNCCI tashi taitba kümdaktsütsü asoshi nungita yaritsü aser kati ka ajungshitsü nangzük.
Business session nung sentepa aliba lokti ajaki mulunga constitution adopt süa ayu aser iba sülen ketdangpurtem shim. Lokti-i Dr. Khekugha Muru mendenbuba, Nguille, M.Rai aser Ruguo Kesiezie Desmo na vice chairman, Dr. Seyievilie Mor General Secretary aser Nuyi Hoshi Joint Secretary asütsü shim.
Business hour tembangba sülen Vice-Chairman tepela ankup o jembiba mapang pai parnok dak temulung lemteta mapa benoktsüba atema lokti tenüng asang aser lokti-i sarasademer senden tembang.