2buba Film Festival Kohima nung agitsü

Hotel East Gate, Kohima nung October 15, 2019 nü 2buba Nagaland Film Festival atema  osangbener den senden agiba mapang Director IPR, Limawati Ao aser President FAN, Kivini Shohe nati FAN logo sayatsüba yangi noksa ka angur. 

Dimapur, Mongputeni/October 15, 2019 (TYO): Capital Convention Centre, Kohima nung October 31 aser November 01, 2019 – anogo ana tashi Film Association of Nagaland-i 2buba Film festival sentong ayongzüktsü ternemba lir. Film Festival sentong ya IPR Department ajanga sponsor asütsü, ta osang ajanga metetdaktsü.
“Iba ama festival sentong ya Nagaland nung mezüngbuba asütsü, kong North-East states ajak nungi film yanglurtemi shilem agitsü, ta October 15, 2019 Mongolbarnü Hotel East Gate, Kohima nung 2buba Nagaland Film Festival sentong asoshi osangbener den jembiba mapang, Director IPR, Limawati Ao-i metetdakja liasü.
Iba sentong nung film tem sayuba dak alia, taruba film yanglurtem atema master class, telok olemtepba aser tanga inyakyimtem achaayanga agitsü.
Limawati-i ashiba agi, “Film Festival agiba mapang tanga sentong ka atema nüngtugu Bollywood Film Producer & Director, Subhash Ghai aruagi adentsü osang angazüka onok pelar aser November 1, 2019 nü agitsü aliba sentong nung pai shilem agitsü imlar.”
Sentong nung Subhash aruagi adenba ya film yanglurtemi pa den ajurua, metepelatsü asoshi maongka tajung asütsü, kechiyong promoter ka ama pa indang reju nung film yanglur, playback singers aser artists tem nem pai training agütsür, ta Lima-isa ashi.