2buba International Hornbill Naga Wrestling C’ship 2018

Kohima, Yimpoksüi/December 2 (TYO): 12buba International Hornbill Naga Wrestling Championship 2018 Luchii/December 4 nü Naga Heritage Village, Kisama Amphitheatre nung akatsü, kong asayar 32-i shilem agitsü. Angami Sports’ Association (ASA), Chakhesang Wrestling Association (CWA), Zeliang Wrestling Association (ZWA) aser Senapati District Wrestling Association (SDWA) Manipur nungi asayar ti ti lir.
Hornbill Naga Wrestling Championship ya Department of Tourism, Nagaland-i senotsü teyari agüja Nagaland Wrestling Association (NWA)-i 2007 nungi ayongzüka kümshia asayaa arudar. Iba asayamung tenzükba otsü ya khenyongi balaka lir saka asayamung tali atsülangshia NWA constituent units dak alia Poumai, Ao aser bendanglen nungi raliwalirtem-ia shilem agia arudar.
Taküm 12buba edition nung iba asayamung shilem ana küma lemsar asayatsü. Professional jenjang nung NWA constituent Units (ASA, CWA, ZWA) aser SDWA nungi asayartem densema lir aser tanabuba jenjangji Amateur & Tourist category asütsü.
Amateur & Tourist Category kübok asayatsü asoshi state kübok aser state adena orr alir asayartem jaokogo. NWA ketdangser sangdong ka ajanga, Angami, Chakhesang, Zeliang aser Poumai dak alaka Naga kin ajaki Amateur & Tourist category nung shilem agitettsü ta ashiba den Phom aser Lotha kin nungi asayar kakabo iba asayamung nung shilem agitsü asoshi züngoksemogo, ta metetdaktsü.
Maneni NWA puri Maharashtra, Karnataka, Delhi aser kidanger state tem nungi asayartemi iba category nung shilem agitsü imlar. Asayamung nung shilema gitsü asoshi angati asütsü aser Luchii/Dec 4 nü 9:00 ako matong tsüngda tenüng züngoksemtettsü mesera NWA Officials den tenüng züngoksemtsü asoshi iba number; 9612111544 nung tongteprateptettsü.
Iba asayamung nung takoker nem senpet sen 1,00,000 agütsütsü aser tanabuba jenjang nung takok angurnem senpet sen 60,000 agütsütsü. Tasembuba aser pezübuba jenjang nung tembanger nem senpet sen 30,000 aser 20,000 den kuli kaket agütsütsü.
Amateur & Tourist category nung takok angur pezü nem senpet sen 30,000, 20,000, 10,000 aser 5,000 agütsütsü.
Kasa mapang nung iba asyamung lapokba sentong nung Nagaland Taekwondo Association & Convenor Northeast Taekwondo Association tir Pele Khezhie tetushi tesemdanger asütsü.
Hukhoneyi Soho (CWA), Surhoneyi Soho (CWA), Keneigulie Nagi (ASA), Visevo Zahumo (ASA), Huvenu Phesao (CWA), Vecusuyi Chuzho (CWA), Hangcheu Zeliang (ZWA), Ekie Zeliang aser Seyielhuokho (ASA) nunger referee aser tetendangertem asütsü.