2buba Kewhimia open wrestling championship Oct. 22 nü tenzüktsü

Kohima, October 3 (TYO) : Arishi küm 25 tekübok pur atema ayongba, 2buba Kewhimia open wrestling championship, D. Khel ground Kohima village nung October 22, 2016 nü nungi tenzüktsü.
Iba melangtepba sentong ya Kewhizou Entertainment Team (K.E.T) teyari ajanga amongerba lir.
“Iba sentong ya Kohima village lisopur melangtepertem ajungkettsü nükjidong nung Youth Resource & Sports, State Lotteries Parliamentary Secretary aser D.P.D.B Kohima nung mendenbuba, Khriehu Liezietsu-i tenzüktsüba lir,” ta Entertainment Team (K.E.T) Organising Committee nung Convenor Ketholhoutuo Belho-i Hombarnü osangbenertem den jembidang ashi.
Pai, Kohima village nung lanur melangteper ajungmesotsü aser melangteper tajung kümdaktsütsü nükjidong nung K.E.T-i arishi küm 25 tekübok pur atema iba open wrestling championship ya ayong, ta ashi.
Melangtepba ya Naga nunger atema kanga nüngtugu aser sentsüket saisapong ka lir. Iba asaya ya Naga nunger ajaki meimer aser sapur aser iba melangtepba nung takok angurtem nem senpet ai-ii agütsür.
Ajisüaka Naga wrestling championship aser open Naga wrestling championship otsütem nung, Kohima village yim ajak dang tulutiba süaka, tang tashi nung  champion ka dang adoka lir. Anungji K.E.T-i iba sabang ya ajanga melangtepertem tanga sabang tulu nunga oa shilem agitettsüsa renemshitsütsü atema ayonga akar.
Iba melangtepba nung takok angur nem sen 35,000, tanabuba jenjang nung takok angur nem sen 20,000, tasembuba jenjang nung takok angur nem sen 15,000 aser pezübuba jenjang nung takok angur nem sen 10,000 senpet agütsütsü. Iba den külemi quarter-final nung makoker shia nem sen 5000 aser Best tactic nema sen 5000 angütsütsü.
Iba open wrestling championship nung adentsü atema form L. Khel-Neisaü Dzüvichü, T. Khel- Mhasizotuo Sekhose, D. Khel-Suosahie Sachü aser P. Khel -Ahu-u Rutsa nung angutsü aser form agütsütsü anogo October 19, 2016 nü tatembang asütsü.