2buba Test nung South Africa-i India akok

Centurion, Aenjeti 17 (Agencies): South Africa nunger Lungi Ngidi-i India den tanabuba Test nung mezüng asayadang India nunger batsmen tem mangmangdakja kanga junga asayatetba ajanga Proteas temi takok ngua iba series 2-0 nung Faf du Plessis teloki kokogo. India aser South Africa tsüngda tanabuba Test ya Centurion nung asaya. Tanabuba Test mezüng innings nung runs 153 ngutetsang, Virat Kohli kisüngi dang India telok nungi junga asaya aser tanüngba batsmen tem katia tanabuba innings nunga junga masayateti runs 287 ajungtsü merang, saka India-i runs 151 dang yangluteter lia ajak out süma aser iba yongji South Africa-i runs 135 agi akok.
2015 küm Sri Lanka nung Test match asaya tenzüker India-i series toku tashi nung khen danga tamakok malui asaya arua liasü, saka iba jenjang nunga tamakok ajuruogo. Luchii (December) nung Sri Lanka den asayadang takok anguba ajanga India-i Test series toku tashi kokyonga arua Australia-i 2005-06 nungi 2008 tashi series toku tashi kokyonga aruba den sako aküm, saka Centurion Test nung tamakok aluba ajanga iba alema motet.
Centurion nung asayaba mapang India nunger batsmen dak kanga imla liasü, aser talisa 2017 küm India nunger tebur cricket asayar rongnung tajungtiba ana, Virat Kohli aser Cheteshwar Pujara dak tiemla tulu liasü, saka kasa Test mezüng innings nung Kohli-i pa asoshi century 21buba yanglutetaka Pujara ya run-out ana tashi süa nüngdak maliba otsü dang yanglu.
Bowling tsütsüa India nungertemi junga masayatet. Ishant Sharma asayadaktsütsü mechi Kholi-i Bhuveneshwar Kumar anisüngzükdaktsüba nunga süngjang tajung madang aser iba den külemi Mohammed Shami, Jasprit Bumrah aser Hardik Pandya nungeria inning anaprong nung alakteta masayatet.
India nungertem nungi Rohit Sharma (47)-i tanabuba inning nung timtiba yanglutet. Mohammed Shami-ia iba inning nung run 28 yanglutet.
Over 49buba nung arishi küm 21 tain, Lungi Ngidi-i India nunger Mohammed Shami out sütsüba ajanga iba inning nung pai wicket trok out sütsü aser run 39 dang agütsü. Proteas nungertem rongnungi Kagiso Rabada-ia wicket asem agitet.