2G scam ken o nung Manmohan aser UPA maitsü: Kapil Sibal

New Delhi, December 21 (Agencies): Brihostibarnü Congress lenir aser advocate Kapil Sibal-i, 2G scam ken o nung nisung shinga maitsüi chiokbaji ajanga taoba mapang Ato kilonser, Manmohan Singh aser UPA sorkari, telecom company tem nem spectrum aser licences lemzüktsüba nung ochimashi maliasü, ta jembibaji shidak, ta kuli sayur, ta metetdaktsü.
Sibal-i, “Manmohan Singh aser UPA sorkari jembibaji shidak ta tanü kuli agütsüogo,” ta ashi.
Taoba Telecom Minister A. Raja aser DMK MP Kanimozhi na den tangartem 2008 2G ken o nung tai tonglokja liasü ajisüaka, tanü New Delhi nung special court kati spectrum allocation scam ochimashi ken o nung parnok dak tai kuli mengui chiok.
Sibal-isa taoba Comptroller and Auditor General (CAG), Vinod Rai aser par telecom audit report-i tatok meshitsüla, ta takhangba agütsü.
Sibal-i, “Rai-i linük dang tatok meshitsüla, kechiyong tanü telecom industry jenjang tamajung nung lir. Pa dang aser taoba mapang opposition (BJP) dang pelar,” ta metetdaktsü.
DMK lenir, Raja anentsüba sülen Sibal-i pa melenzük, aser paisa, BJP sorkaria United Progressive Alliance (UPA) sorkar dang tatok meshitsüla, ta takhangba agütsü.
“Parnoki (BJP) tatok meshitsüla, kechiyong parnoki Lok Sabha nung (taoba) Ato kilonser aser Congress aitsü. Tanü obendang agütsüba ajanga taoba sorkari jembiba tu shidak ta kuli sayur,” ta paisa ashi.
Sibal-i tamalen nungi, pa Telecom Minister inyakdang sorkar senpong nung takoksa kecha mangu aser licences agütsüba inyakyim nung ochimashi maliasü, ta jembia aru.
Pai, “Ni nüburtem dang iba ken o nung ochimashi maliasü ta aiben jembia aruogo. Aser tanübo ni jembiba, taoba sorkar aser taoba Ato kilonseri jembiba tu shidak ta kuli nguogo,” ta ashi.