2th Imchaba Master Memorial Nagaland Open V/ball trophy tenzükogo

Mokokchung Sr. Treasury Officer, Toshizenbai 12th Imchaba Master Memorial Nagaland Open Volleyball Trophy tenzüktsür külen, mezüng asayatsü pur yaküm champion Lakhuni Sporting Club B aser Paola Club Tsüktikong asayartem aser MDVA ketdangsürtem kar noksa nung angur. Mokokchung, September 26, 2017.

Mokokchung, Sept 26 (TYO): Mokokchung Sr. Treasury Officer Toshizenbai asür Imchaba nüngtem asayaba 12 buba Imchaba Master Memorial – Nagaland open volleyball trophy meraketa tenzüktsüogo. Iba asayamung ya Mokokchung District Volleyball Association-i volleyball jangrar lanurtem anitena parnok nem sabang lapoktsütsü nükla yur kümshi ayongzüka akar.
Taküm iba asayamung nung Mokokchung district den ano Tuensang, Peren, Zunheboto district nungia telok kar arua shilem agidaki. Telok ajak agi 17 lir aser parnokji group pezü küma lemsar asayadar. Pool ‘A’ nung yaküm champion Lakhuni Sporting Club B, Paola Club Tzütikong, Tongden Club Chungtia A, Friends United Chakpa B aser Sakutemjen Memorial Club Chungtiayimsen nungertem lir. Pool ‘B’ nung Sporting Club Mangkolemba, Evergreen Club Ungma, Waromung Sports Association Jangjanglong Club aser Leerie Team Mokokchung.
Pool ‘C’ nung Friends United Club Chakpa A, Kumlong Sporting Association, Tongden Club Chungtia B aser Young Spiker Tuensang aser Pool ‘D’ nung Supongmeren Memorial Club Molungkimong, Young’s United Club (FAC Campus), Team One (Peren District), aser Young Stallone Club Akuluto (Zunheboto) nungertem densema lir.
Iba asayamung shir teloki bendir parnok nem tanga senpet den sen 70,000/-, tanabuba jenjang angur nem 50,000/-, tasembuba jenjang nem 25,000/- aser pezübuba jenjang tashi atur nema 15,000/- agütsütsü. Iba den ano nija/jurila sempet Best Setter, Best Spiker aser Player of the Tournament nungertem shima senpettsütsü.
Iba asayamung nung jangratemtsü kaji; tanga district nungi arurtem team nem taru-tao (minimum travelling allowance) sen agütsütsü aser Mokokchung district telungtet nungi shilem agir team nema ‘participation grant’ ta sür shilem agiba teyari sen terara agütsütsü, ta tayongeri metetdaktsü.
Tanü iba asayamung tenzükja tongti tesemdanger Toshizenbai jembidang, MDVA-i lanurtem ajungshia iba asayamung küm 12 tashi metitemi takok ngua ayonga aruba asoshi pelaba den Master Imchaba’r jala jabaso aser semchirtemi nungita yariba asoshia pelaba lemsatep. Aji oda, iba asayamung ajanga asen lima nungi national player aika adoktsü imlar, ta paisa ashi.
Paisa saisapong ya temang anema alitsü asoshi dang masü saka professional küma asayatsü asoshi ajungshia liasü. Asayar kati takok angutsü atema asaya temzüng ozüng shitak benshiba den pei team captain aser referee-tem akhümtsübutsü tim, ta paisa ashi.
Meranga inyakba medeni taküm nung takok kecha majangzüktet, kechiyong meranga inyakba nung yabo temelen kecha mali, aji oda, shitak lenmang nung merangba/aoba nungji tamakok malitsü, ta paisa ashi. Takok angutsü asoshi nükjidong ayubaji teperi masü saka nükjidong ayuba den meranga inyaktsü nüngdaker, ta paisa asayartem ayongzüka liasü.
Asayar tajung kati takok ajurudang kodanga tezü matanger, kechiyong takok aser takokji külemi dang aor ta pai/lai angateta lir aser tamakok anguba shia lesson agir. Aji oda, tanü takok anguba aser tamakok angubaji tatembang masü, tanü tamakok nguaka, asüng takoker asütsü menua mali, ta paisa asayar shiai mulung nung ayutsü olen ka lemsatep.
Tanü mezüng asaya Pool A nungi yaküm champion Lakhuni Sporting Club B o Paola Club Tzütikong na asayaba Lakhuni Sporting Club-i 25/17, 25/20 aser 25/23 agi ayongayonga koka liasü.