3 buba All Nagaland Veteran Badminton asayamong tenzükogo

Kohima kübok Indoor Badminton Stadium nung 3 buba All Nagaland Veteran Badminton Tournament tenzükba jakdang Evening Club Kohima züngsemtemi asayamong lapokba sentong nung tongti tesemdanger, Kohima Deputy Commissioner, Rovilatuo Mor den aroki agiba noksa ka yangi angur. (Kohima, June 24)

Kohima, June 24 (TYO): Kohima Deputy Commissioner, Rovilatuo Mor-i lapoktsüba sülen tanü, Hokolbar nü nungi tenzüka Kohima kübok Indoor Badminton Stadium nung 3 buba All Nagaland Veteran Badminton Tournament asayatsü tenzükogo.
“Badminton asayar mongintemi tan asayamong nung shilem agiba ajanga lanur asayartem ajungmesotsü imlar. Lanur asayartemi tazüokba nung lia par alizüng tongtettsüsa saisapongtsüren nung shilem agitsü ajungshitsü asoshi asayar mongintem ayongzüker,” ta Rovilatuo-i metetdaktsü.
“Nagaland nung badminton aser football na densema, saisapongtsü jenjang kanga junga akümtsü tenzükogo,” ta shia, national dang masü international sabang nung tangar den toktepa shilem agitettsüsa asayar tajung adoktsü mapang atongba olen ka pai lemsatep.
“Saisapongtsüren ya  rongsen tajangzük jenti anguba sabang tajung ka lir. Anungji, asayartemi tajungtiba agüja shilem agiba ajanga takokba aser konang bener arutsü ajungshir,” ta tongti tesemdangeri shisem.
Tanü sentong nung asayamong tayonger luden mendenbuba, Arep Ao-i sentepa alirtem pela agizükba den külemi, asayartemi temulung agüja shilem agiba ajanga iba asayamong kümshi ayonga agiba asayamong akümba osang lemsatepa liasü.
“Iba asayamong ayongba ajanga district balala nungi asayartemi külem asayar den toktepa shilem agitsü maongka tajung angur,” ta paisa shisem.
Arishi küm 35 ser tema, 40 ser tema, 45 ser tema, 50 ser tema aser 55 ser tema tain shilem densema, anogo 2 agia asayatsü ayongba asayamong nung shilem agir asayartem arishi küm shilem 5 tashi lemsatsür asayatsü tenzüka lir.
Evening Club Kohima (ECK)-i ‘Inspire a new Generation’ omen nung ajemdaker ayongba asayamong lapokba sentong ya Dr. Violar Solo-i ania agia liasü.