3 buba Master Shield Trophy 2019 Vincent ‘A’-i benogo

Mokokchung, March 2 (TYO): Taoba Feb ita 20 nungi tenzüka Mokokchung District T20 Cricket Federation (MDT20CF)-i ayongzükba 3 buba Master Shield Trophy Imkongmeren Sports Complex Mokokchung asaya arur, March 2 nü takok ngua tembangogo aser taküm iba asayamung marok Vincent A-i benogo.
Tanü final match Vincent ‘A’ aser Tritons (Dimapur) na asayaba Vincent-i wicket 5 agi Tritons madak takok tulu angu. Tritons pur mezüng bat asü aser parnok 18.5 over nung run 104 dang yanglur wicket ajak tsükatok. Aji sür, Vincent puri iba run-ji arishia parnoki over 18 buba nung wicket 5 dang tsüker Tritons-i yangluteta akaba run-ji ajangteta taküm iba asayamung marok parnoki bena liasü.
Taküm iba asayamung nung Dimapur aser Wokha district nungi telok ana densema telok 8-i shilem agia liasü. Takoker champion nem senpet sen 35,000/- den asayamung marok aser kuli kaket agütsü aser tanabuba jenjang nema sen 20,000/- den kuli kaket agütsüogo.
Jurila/nija senpet angurtem itemi liasü; 1st semifinal man of the match – Opendar (Vincent A), 2nd semifinal man of the match – Aosashi (Tritons), Man of the match final – Sunil (Vincent A), Best wicket keeper – Nripen Rai (Vincent A), Best bowler – Chubameren (Tritons), Best batsman – Vikash (Trebuchet), Highest sixes of the tournament – Vikash (Trebuchet) aser Man of the Series – Hem Bahadur (Tritons). Parnok ajak nem kuli kaket den senpet sen densema agütsü.
Iba asayamung takok ngudaktsütsü asoshi co-sponsor NYK (Mokokchung)-i anir kija aser telok balala shirnokisa tenla tajung agüja yaritepogo, parnok ajak dang pelaba Mokokchung District T20 Cricket Federation tir, Imnayangeri metetdaktsü.