31 buba ATA mungdang meraketa tenzükogo

Longmisa Baptist Arogo Youth Department-i mungdang lapoktsüdang agiba noksa angur. 

Longmisa, May 26 (TYO): Ao Theological Association (ATA) pur 31 buba kümsem inti mungdang “Lokti libaliru nung ochi kulisür taküm” (integrity in public life) omen nung ajemdaker Hogulbar aonung yangi Longmisa yimtak meraketa tenzükogo. Iba mungdang nung Aor laishir noklang aika adenshia shilem agia dendaki.
Iba sentong nung Tir Yimyim yimozülur Wb. K Temjen Jamir-i tayongzükba o jembidang, tanü ochi mashibaji yimden nung dang masü, saka arogo nunga tashimait aika lir, ochimashiba ajanga taküm nung tetsükdaktsü jenti ajurur, anungji, Laishirtemi itemji shisatokdena bushitsüla aser iba anemaji inyaktsüla, ta ashi.
Tanü yimtsüng aser town aika nung school kitem temeimtsü tia nung aliba angur, anungji, arogotemi school-tem jenjang tajungba kümdaktsüba maparen nung shilem agitsüla, ta paisa ayongzük.
Tenla ki asüba nungi tenzüker arogotemi maparen ajak nung ochishia inyaktsü nüngdaker, ta K Temjen-isa ashi.
Ochi mashiba rongsen agi arogo takar akümba aser mission mapa tulu inyakba dang nungibo ochishia alibajisa tajungba aser ibajiang temoatsüba asütsü, ta paisa shisem.
Tanü arogo tiaji “arogobo tajung saka arogopur majung aser arogobo takar saka arogopurbo sensaker”, ta asüba jenjang nung lir, ta paisa sasaba olen ka ashi.
Paisa laishirtem nem inyakdaktsüba kar ashidang, ochimashi temenen mapatemji tashiyim agi masü saka azü metokshii ochi aser sarasadem agi raratsüla, ta paisa ayongzüka ashi.
Tenzükba mapa nung tatidang aika arutsüa akok saka Tsüngrem dak dang rangloker inyakra, temenen mapatemji asenoki koktettsü, ta paisa ayongzüka ashi.
Hokolbarnu aonung 31 buba ATA inti mungdang tenzükba sentong nung ATA Director Talijungla-i iba mungdang omen “Loktilibaliru aser inyakyim nung ochi taküm” ta asüba nung ajemdaker Tsüngrem o jembia liasü.
Iba sentong ya May 28 tashi alitsü aser sentong nung Rev. Dr. Takatemjen aser Dr. P. Kilemsungla nati omen dak ajemdaker onük balala jembitsü aser Rev. O Alem, Rev. Dr. Mar Atsongchanger aser Wb. Tsüknung parnoki Tsüngrem osang abentsü.