’31st October’ film ajanga 1984 Sikh anema rara jungkai adoktsür

October 21, 2016: National Award takok angur Marathi film yanglur, Shivaji Lotan Patil indang Hindi film, ’31st October’ ajanga 1984 küm Sikh nunger anema rara tulu adokba jungkai aoktsür, aser iba film ajanga Maharashtra Chief Minister, Devendra Fadnavis aser Delhi Chief Minister, Arvind Kejriwal na densema yimtenren lenirtema kar kongshiogo.
Thriller film ya 1984 küm taoba mapang Ato kilonser, Indira Gandhi tepsetba sülen Sikh nunger anema rara tulu adokba otsü nung ajemdaker yangluba film lir.
Tamasabo iba film ajanga timtem kar ajurua liasü, kechiyong Congress Party pusemer kati iba film sayaba nokdangtsü atema Delhi High Court nung temepishiba (PIL) ka benoka liasü.
Iba film nung Sikh nunger apuani ka adoker aser iba shilemji Soha Ali Khan aser Vir Das, nati agir. Tenati par chir asem longkak aitertem ket nungi kümzüktsü meranger, aser par kibong tembar Hindu nunger asemi parnok yarir.
Critics temi iba film ya yimtenren nung ajemdaker yangluba nüngtugu film tem den kasa jenjang nung asadanga jembiogo.
Writer-producer, Harry Sachdeva-i, “31st October film ya tamangba lokti tsüngda tesünep nung alitsü aser meimchir temeim alitsüsa junga yangluogo. Asürtem nem akhüm agütsüba dak alia iba film ajanga India nunger nüchiso anguba sülen putiotsü nung anogo tamajungtiba maang nung hero tem indang sayar,” ta ashi.
Ano Soha Ali Khan-ia, “Iba ya merangdangtsüsa onük tezüba ka masü. Onmoki metet, onoki film tajung ka yangluogo aser iba film ajanga takok ngutettsü imlar,” ta ashi.
31st October film ya July 18-20, 2015 nung London Indian Film festival mapang screening süa liasü aser October 21, 2016 nü sayaogo.