32 AR-i Royimchu’er ki mita reprangba aitsür: NSCN/GPRN

Dimapur, May 07 (TYO): May 06, 2017 ayaterm 12:00 ako nungi anepdang 1:05 ako tashi tetsür sepai ana densema 32 Assam Rifles sepaitemi Dimapur Naga Gaon (Signal Angami) nung Dy. Secretary, Finance in-charge of Tuensang, Royimchu’er nija ki mita reprangba sülen 32 Assam Riffles-i, noklang nung shilem 5 saruba receipt book, tawa audit agiba cash book aser region atema Payment endorsement bener aobaji NSCN/GPRN-i aitsür, ta tanü GPRN Ministry of Information & Publicity-i sangdong ka nung metetdaktsü.
32 Assam Riffles aruba sülen “Report” tenüng atemer ki mita reprangba, aser parnoki tejak nembanger pei maitsü mimshiba den identification badge makai iba mapa inyakbaji khenyongi ceasefire ground rules alema inyakba lir, aser ibaji ajanga tetsür aser tanurtem tsübuokdaktsür. Tang agi tasembenbuba Assam Riffles-i iba ki mita repranger, ta kasa sangdong nung shia lir.
Iba ama ozüng alema inyakba ya tawa, April 18, 2017 nü New Delhi nung India sorkar aser NSCN na tsüngda senden amenba den khenyongi mapet, anungji 32 Assam Riffles-i tekaraba nung pua aliba kakettemji Monitoring Cell ajanga agütsütsü metetdaktsür, ta kasa sangdong ajangasa metetdaktsü.