33 buba Mayangnokcha Awards for Academic Excellence agütsüogo

Dimapur, October 30, 2026 (TYO): October 30, 2026 nü Mayangnokcha Awards for Academic Excellence (MAT) 2026 33 buba Presentation Ceremony agiogo.

Iba sentong ya St. John Higher Secondary Residential School, Dimapur nung agi aser MAT nung Trustee Dr. Kilangwabang Pongener-i o jembidang alima melenshiba den külemi shisaliok melenshia anidaktsü nüngdakba ashi.

Tanü artificial intelligence, automation, robotics aser tanga technologies balala adokba putu nung shisaliok melenshia anidaktsüla ta pai ashi.

Shisaliok ya kaketshirtem tatidang asoshi renemtsüba dak alia asütsüla. Kaketshirtemia technology ainba sülen anidaktsüla aser independent thinking, creativity, empathy o ethical judgement memeleni artificial intelligence ya hadir ka ama benshitsüla ta Dr. Kilangwabang-isa ashi.

1990s tetenzüklen lanur telok ka longjemer Nagaland nung academic excellence ajungkettsü aser education system akangshitsü atema Mayangnokcha Award Trust tenzüka liasü. Mayangnokcha-i pa taküm piyong Naga nunger dang sayutsü atema bendanga agüja liasü aser pa nüngtem nung 1994 nungi item sempettem agüja arur ta paisa metetdaktsü.

Alima melenshitsü atema hadir tajungtibaji shisaliok lir ta Nelson Mandela-i ashi. Singapore-i shisaliok nung senotsü aika endokba ajanga linük renloker aser rongsenketzüng ainer ta Dr. Kilangwabang-isa tatishitsü bener arua kaketshirtem ayongzük.

Subject toppers nem senpet agütsürtem, Nagaland Board of School Education, Mayangnokcha’er kinungertem, sentong amungba reju, award angurtem, tsüraburtem, tesayurtem aser sentong nung shilem agir ajak dang pelar ta paisa ashi.

Tanü agiba sentong nung trustee Akok Walling-i “Excellence with Integrity: Building Character in a Competitive World” omen jembi.

Pai sempet angurtem nem tenüngsang agütsü aser tsüraburtem, tesayurtem aser shisaliok rejutemi parnok takok angutsüsa yaritepba atema pelaba metetdaktsü.

Academic excellence ya marks tajung anguba agi dang masadangtsüla saka taküm nung takok tuluba angutsü atema tamendakdak ka asütsüla. Chichiba excellence ji nisung kati metetbaji dang masü saka iba shisatsüji koma angateter aser loktiliba ajangzüksa koma amshir ta asüba lir ta Dr. Akok-i ashi.

Taküm atema Isaiah Ability Higher Secondary School, Wokha nungi BenchumoTungoe nem Mayangnokcha Award for Academic Excellence agütsü. Pa ya overall topper lir.

Queen Mary Higher Secondary School, Mokokchung nungi Imnokila Mollier nem MAT-Rockdale Award (Ao (MIL) subject topper) agütsü.

Isaiah Ability Higher Secondary School, Wokha nungi Benchumo Tungoe nem MAT-YRSD Award (Social Sciences subject topper) agütsü. Iba ya Youth Resources and Sports Department, Nagaland ajanga agütsür.

St. Paul Higher Secondary School, Dimapur nungi Ikehakpeule nem MAT-TY Award (Science subject topper) agütsü. Iba ya Tir Yimyim Daily, Dimapur ajanga agütsür.

Mezhür Higher Secondary School, Kohima nungi Thepfukuolie Mere nem MAT-EFOM Award (Mathematics subject topper) agütsü. Iba ya Education Forum of Mokokchung ajanga agütsür.

St. Joseph’s Higher Secondary School, Chümoukedima nungi Keneitseinuo Celine Belho nem MAT-CEC Award (English subject topper) agütsü. Iba ya C-Edge College, Dimapur ajanga agütsür.

Northfield, Khikha nungi Neilhou Belho nem MAT-Lenjeter Award (Agriculture subject topper) agütsü.