Junga amoa oa memejangba agi timtem adokdaktsüba pungu

Nisung kaji aonung shia gondha 7 mesüra 8 amoa oa mejangtsü tim ta asenoki angashiogo, ajisüaka asenok mapa balala agi mazüngba ajanga timba ka aonung shitak anisüngzük mongutetter. Aonung ka junga animesüngzükba agi tangbo temang nung teti atema timtem magütsür ajisüaka teti junga amoa oa memejangba ajanga temang nung mokoktettsü timtemsa adoker.
Junga amoa maoba ajanga adokba temang timtem pungu yamai lemsateper:
Temulungjang tashidak: Aonung junga memejangba agi temulungjang indang blood vessels nüngdakba ama meyanglushir aser iba jagi temulungjang tashidak aser high blood pressure adoktsüba den stroke mela mela asütsü ana nung lir.
Diabetes: Aonung shia gondha pungu tekübok mejangertem dak diabetes mela adoktsü.
Tango sashiba timtem: Junga amoa maoba ajanga tashidak den raraba mesen tajung tashi mait kümdaktsür aser ibaji ajanga tangosashiba nung timtem adokdakja yimra yimshi kanga kara atonger. Tepokpok tashidak alirtem tamajunga akümtsü.
Shisatsü nung timtemtsü: Teti junga amoa oa mejangba ajanga mitmero mejungi lidaktsütsü. Shisatsü mazüokteti sowar amai akümertemji junga mejangba agi lir ta bushisüngdangertemi ngutetogo.
Temang tuozük tali akümtsü: Kanga junga anisüngzüka memejangtetba agi asen temang nung calorie tali agitsüsa akümtsü, aser iba jagi menüngdakba seret atudakja temang chizükdaktsür. ‘Clinical Nutrition’ kaket nung junga amoa oa memejangertemi tananüji 385 calorie tali achitsüsa akümer ta shia lir.
(Source:Internet)