35 AR-i Mon nung telungpur 2 apu

Mon, November 10 (Agencies): Nagaland kübok Mon district nung telungpurtemi ozüng alema saru kangzüka senzüba ken o nung ajemdaker 35 Assam Rifles (AR) mitkartemi telungpur nisung 2 tashi tan November ita 7 nü apuba osang metetdaktsüogo.
Mon nung alir nübur aser shishilembartem nungi ozüng alema saru kangzüka senzüba osang angazükba sülen Headquarters 7 Sector Assam Rifles kübok densemer 35 AR mitkartemi Nagininora jila nung telungpur mittsü mapatong tenzüka, telungpur nisung 2-ji apu.
Tan apuba nisung 2-ji NSCN(K) telok züngsem, Mokokchung district kübok Merangkong nnger peisasa tenüng jatetba Sgt Maj Rokermangyang aser Mon district kübok Wanching nunger peisasa tenüng jatetba Corporal Naimang na lir aser tena tang Naginimora nung tentetba Police Station tongtsüogo.
Mon district talisa, Naginimora jila nung ozüng alema saru kangzükbaren aser tensa mejungi kümdaktsübaren azüokba atema nüburtemi AR mitkartem dang pelaba osanga angazükogo.