37 Assam Rifles-i NSCN (KK) züngsem ka apu

Dimapur, October 27 (TYO) : October 23, 2015 nü 37 Assam Rifles-i Chumukedima area nung NSCN (KK) nung Under Secretary ka apu.

Prangpong abener NSCN (KK) züngsem ka senzüba osang tejangja angazükba sülen Assam Rifles-i iba nisungji aputsü atema bushitsü tenzük, ta AR sangdong ka nung metetdaktsü.

Sepaitemi temulung melemi bilemba nisung sülenji anidak aser tatem nung Golaghat Road nung aliba Bus Stand anasa pa apu. Idakji pa mang mita reprangdang Point 32 Pistol ka den magazines 2, Point 22 Pistol ka den magazine ka aser mobile phone ka ngutet, ta sangdong nungsa shia lir.

Iba nisung ya Purana Bazar nung alir Vkinny Sema ta jangjaogo aser pai pa NSCN (KK) (Civil Wing) nung Under Secretary inyaker ta nangzük. Pai bena aliba prangpong-injangtemji nisung ka dang ayoktsüba liasü ta paisa sepaitem dang ashi. NSCN (KK) züngsemi inyakba mapaji Ceasefire Ground Rules anema liraser pa den külemi apuba osettemji Dimapur East Police Station ket nung agütsüogo, ta Assam Rifles sangdong nungsa metetdaktsü.

NSCN (KK) züngsem apuba ajanga Dimapur aser Chumukedima nung prangpong-injang shibelenba maparen inyakba jungkai adoka sayur aser iba tatalokba ajanga item tesem nung tensa tajungba kümdaktsüogo, ta sangdong nungsa shia lir.

You must be logged in to post a comment Login