39 buba Inter Dist. State Badminton asayamong tembangogo

39 buba Nagaland Inter District & State Open Badminton Championship 2015 nung overall team champion, Nagaland Police teloki tongti tesemdanger, Nagaland Parliamentary Secretary, Fisheries & Printing & Stationary, Shetoyi Sumi den aroki agiba noksa ka yangi angur.

Dimapur, August 10 (TYO): 39 buba Nagaland Inter District & State Badminton Championship 2015 tan August 7 nü takokba nung tembangba osang ka tayongeri tanü Hombar nü metetdaktsüogo.
Asayamong tembangba sentong nung Nagaland Parliamentary Secretary, Fisheries & Printing & Stationary, Shetoyi Sumi tongti tesemdanger liasü.
“Nagaland nung badminton asayartemi par saisongtsü sempet tajung temaba jenjang nung ajungktettsüsüa sabang tajung renemtsüba atema tayonger dang kanga pelar. Cricket sülenbo India ajunga nung badminton ya kanga dang tongtipangsüa züngokba asaya tanabuba lir,” ta tongti tesemdangeri metetdaktsü.
Alima ajunga nung sen timba anguba badminton asayamong, Indian Badminton League (IBL) tentetba ajanga badminton asayartemi saisapong ka ama dang masü saka parnoki pei tepok mesütettsüsa badminton asaya ya tanübo akümba olen ka pai lemsatep.
“Tsüngremi Naga nunger nem saisapongtsü sempet tajung agüja lir aser lanurtemi temulungtetba tajung yura, alima ajunga nung asayartem den toktepa shilem agitettsü anungji, asen Nagaland nem konang bener arutsütsüsa lanurtemi saisapongtsüren nung shilem agitsü ajungshir,” ta pai ayongzük.
Asaya shilem 26 tashi lemsar asayaba 39 buba badminton asayamong nung takok angur tarensen kar yangi agütsür:
Overall champion : Nagaland police
Men’s team : Nagaland police Dimapur
Womens team : Nagaland police Mokokchung
Men’s singles : Ankur shangpang (Kma), Riku Khape (Dmu)
Men’s doubles : Joseph Sumi & Raju Chetri (NP), Bendangnochet & Chubamongba (Mkg)
Women’s singles : Deepika Kaushik (Mon), Uma Tamang (NP)
Junior boy’s team : Dimapur, Mokokchung
Junior girls team : Mokokchung, Dimapur