3buba King’s Volleyball tournament tenzükogo

Dimapur, Yimpoksüi/November 22 (TYO): King’s Welfare Society, Dimapur puri ayongzükba 3buba King’s Volleyball tournament Yangtepnü Dimapur Government College ground nung tenzükogo aser asayamung lapokba sentong nung Dimapur II A/C MLA, Moatoshi Longkumer tetushi tesemdanger asü.
Asayartem ajungshia o jembiba mapang Moatoshi-i shiba agi, Naga nunger saisapong balala nung sempet tajung aketba asayar aika lir aser aika nüngtugu kümogo, ajisüaka tawa state nung saisapongba tsütsü atsüngzüka lir. Asenok azümesen kümogo aser mela mela sen aazüktsü merangba dak alia saisapong nung bendanga agüja minyaker.
Paisa, meranga inyakba aser bendanga agüja inyakba ajanga nisung kati saisapong balala nung jenjang temaba tonga asayatettsü ta ashiba den nisung ajak asendenshia asen state ya tasen küma yanglushitsü mapang tongogo ta ashi.
Maneni, asayartem nem parnok sempet sayutsü asoshi sabang tajung agütsüba atema pai asayamung ayongertem tenüng asang, aser künübo state nungi asayartemi national aser international jenjang nung asayatsü imlaba lemstep.
Asayamung tenzükba mezüngbuba asaya nung Volleyball for Peace puri Changtongya Volleyball Association 25-19, 25-16, 25-19 agi koka liasü.
Iba asayamung ya league basis nung asayadaki aser Yimpoksüi/Nov 24 nü tashi asayatsü. Iba asayamung nung telok ajak agi trok; Changtongya Volleyball Associtation, Volleyball for Peace, Sakus Mission College, The Chester’s (Akuluto & VK Town), Young Star Longsa aser Brothers Club-i shilem agidar.