3buba Open Penalty Shoot-Out Tournament May 13 nü alitsü

Kohima, April 26 (TYO): May 13 nü D. Khel (Seikhazou) Ground, Kohima village nung Khedi Baptist Church, Kohima kübok Prodigies Group ajanga “Innovating a stronger fellowship” omen nung ajemdaker 3buba Open Penalty Shoot-Out Tournament ka ayongzüka alitsü, ta sangdongogo.
Arogo balala nungi lanurtem sentepa saisapong ajanga telongjem tasen ka kadaktsütsü, football asayar tanüla tejangraba tali kümdaktsütsü aser shishilempartem den tesendaktep tajungba yanglushiba ajanga tarutsü nung teyari agütsütsü nükjitong nung iba sentong ya ayongzüker, ta iba tournament ketdangsertemi sangdong.
Iba asayamong nung mezüng jenjang angur nem sempet sen 30,000 agütsütsü aser iba sempet ya Vuto Motors, Kohima-i agütsütsü. NV Press Kohima-i tanabuba jenjang angur nem sempet sen 20,000 agütsütsü aser Modicare Kohima-i tasembuba jenjang angur nem sempet sen 10,000 agütsütsü. Active Station, High School, Kohima-i pezübuba jenjang angur nem sempet sen 5000 aser goal keeper tajungba nem sen 5000 alang sempet agütsütsü.
Iba asayamong asoshi ‘registration form’ ya sen 100 aser ‘entry fee’ sen 2000 alitsü. Iba ‘form’ ya Town area- Sports World, High School area- Active Station (opposite Axis Bank), BOC area- Kiran Sports & Stationary, MATO Building nung angutsü.
Iba asayamong nung shilem agitsübur temi May 11 tashi nung tenüng agütsütsüla aser May 12, D. Khel (Seikhazou) Ground nung nikongdang 3:00 ako nung ‘fixture’ renemtsü.
Iba tournament ya ‘knock-out’ dang alitsü.
Asaya balala nung amshiba oset, sübutsü aser chiyongtsütem iba anogo nung ayoktsü.
“Iba asayamong ya kija aser lokdi ajunga nungi arua asayartem busemtsü aser parnok arua adenba ajanga temoatsü angutsüsa sentong yanglua lir,” ta Prodigies Group nung ketdangseri ashi.
Iba asayamong nung shilem agitsü asoshi Indira Gandhi Stadium, Kohima nung aliba tetsür team aser Kohima Orphanage Home nem tejaokba shidi agütsüogo.
Kohima District Veteran Football Association nungia iba sentong nung arua shilem agitsü yimlar, ta ketdangsertemisa ashi.
Iba asayamong nung shilem agitsü asoshi state nung aliba asayar telok ajunga pelashishia jaoker, ta Prodigies Group ajanga metetdaktsü.
Maparen balala aser angati mapa balala ajanga Tsüngrem tenzüktsü nükjitong aser tejangraba nung Khedi Baptist Church, Kohima nungi nisung 15 iba Prodigies Group züngsem lir.
Taoba küm iba asayamong tanabuba aliba mapang telok 32 nungi shilem agia liasü.