3D amshia tongtiret yangluba, arishi küm 32 tain tetsür ka dak inoktsü, lai tanaben jajateter

Gurugram, February 16 (Agencies): Gurugram (Gurgaon) nung aliba Medanta mozüki nung inyaker doctor telok kati arishi küm 32 tain tetsür ka indang tongtiret, Bodbarnü melentsüogo aser la akhi ama jajateter.
Iba tetsürla ya tesayur lir. La tanur asotsü asoshi mozü aika agi aser ibaji ajanga la indang tongtiret tapu 10 nung tuberculosis (TB) tashidak atu. La tekolak aser temang sendaktepba teret asem TB ajanga kanga mejungi raksatsür liasü aser ibaji ajanga la tekolak nemzüka alu aser iba ajanga la tongtiret nung timtem tulu adoktakja, la tango sashitsü asoshi kanga saaka aküm.
“Shiranger temang nung timtem kanga tebenja liasü. Saka ‘3D-printing technology’ amshiba ajanga takokba nguogo. La operation agir anogo 12buba nung teyari agia jajatsü akoker, la temang nung tekangshi ajak samaogo, la ola junga adokteter, aser tongtibangsa, la taküm kümzükogo,” ta Medanta nung aliba Bone & Joint Institute nung Senior Consultant (Spine Surgery), Dr V Anand Naik-i ashi.
Medanta nung aliba surgeon teloki ‘intricate computer software’ amshia iba ‘operation’ ya agiogo.
La indang CT aser MRI scan agiba ya software nung upload asü aser 3D printer amshia la dak keta aliba teret amai yanglu.