3rd ODI nung India-i wicket 7 agi New Zealand akok

Kohima, Aenjeti/January 28 (TYO): Nagaland Chief Minister, Neiphiu Rio-i January 28, 2019 Hombarnü Indira Gandhi Stadium nung state indang mezüng Astro Turf football ground lapokja liasü.
IGS Kohima nung Astro Turf amenoktsü maparen ya 2013 nungi 14 tsüngda sen cr. 4.98 agi tenzüka liasü, ta Executive Engineer PWD (Housing) Nimo Kath-i ashi. Nimo-isa, senotsü peria maliba ajanga project maparen anena liasü saka taoba küm Metsüremi/Mar. nung Rio-i aniba sorkar akumba sülen project renemtsü atema Development Expenditure (talila) kübok sen lakh 213 agüja liasü.
Nimo-i, iba project tenzükba ya football asayatsü ground tajung ka agütsütsüsa kong national aser international sabang nung asaya ayongzüktettsü aser iba den külemi State nung alir lanurtem football asaya tim lenmang tem sayua aser anitettsü nükjidong nung liasü.
Astro Turf ya FIFA indang ozüng aser tetuyuba tem amshia amenokogo.
Iba sentong nung Rio-i, latettsüba mapang nung iba project renemba atema Department of Youth Resources and Sports nem tenüngsang agüja jembiba mapang pai “state nung football asaya renloktsü atema asenoki maparen inyak tenzüktsü” ta asüba olen ka shia liasü.
State nung saisapongba renlokdaktsütsüsa, Nagaland district headquarter ajak nung Astro Turf football ground inoktsütsü aser sports infrastructure tajungba yanglutsütsü kechiyong saisapongtsü oset aser kiojen tajung melira tetoktepba jenjang temaba nung Naga lanurtemi takok angutsü atema asenoki imlatsü makok, ta CM, Rio-i metetdakja liasü.
Saisapongtsü oset aser kiojen tajung ta asübaji talisa ground, stadium aser academies ajungba dang masü saka iba nung jenjang aketba shisalen sayur talisa coach, trainer, physiotherapists aser nutritionists tajungtem lir, ta Rio-isa ashi.
Iba olen den Rio-i, sorkari saisapongtsü osettsüset aser kiojen yanglutsütsü atema asalentong yangludar kong district ajak nung iba maparen inyaktsü asoshi maongka angutsü, ta metetdaktsü. “We are engaging proven sports consultants for an infrastructure development plan,”
Iba maparen ya Nagaland nung football asayatsü jangrar tanurtem nungi shir parnok asaya yimya nung renlokdaktsütsü nükjidong nung state sorkari Bhaichung Bhutia Football Schools den longjemtsü, ta Rio-i ashi.
“Nagaland nung football asayatsü jangrar aser sempet alir küm 16 tekübok tanürtemi iba sentong nung shilem agitsü atema maongka angutsü kong asyamung aser junior leagues densema lir,” ta Rio-i ashi.
“Asen Naga nunger mezüng Olympian aser Olympics nung India indang mezüng football captain Dr. T Ao tenüng nung onoki tentet balala tenzüktsüogo. Lanurtem ajungmesotsü atema onoki pa (Dr.T Ao) tenüng tetshia aser akhum agütsüner,” ta CM-i ashi.
Nagaland nung saisaponger ajak dang tanaben bendanga agütsüshir jenjang temaba tongtettsü atema tayongzükba o agütsüba den külemi asayartem nungitsü aser ajungkettsütsü asoshi Rio-i nangzüka liasü.
“Tanü asenoki agiba mera ya kanga tila dang ajisüaka tanü iba mera agiba ajanga asüng asenoki sasaipong tajung aika adokdaktsütsü imlar,” ta Rio-i ashi.
Kasa sentong nung Advisor for Youth Resources & Sports, Zale Neikha-i jembiba mapang pai nüngtugu football asayar Dr. T. Ao shibai saisapong ajanga Naga nunger alima dang metetdaktsü, pa nem akhum tetushi agüja liasü.
“Tanü, asenoki otsü ka yangluogo. Asenoki kanga dang yongyaa aliba aser nükshia aliba Astro Turf pitch asenok nem moatsüogo,” ta Neikha-i ashi.
PDA sorkarji ‘Change’ atema lir aser aji tanü mapa agi sayuogo, ta Paisa shisem.
2018 küm PDA-i aniba sorkar yimsüsüba mapang nungi ita 11 tsüngda terenlok balala rongnung Astro turf inoktsüba maparen ya ka asütsü, ta Neikha-isa ashi.
Maneni, sentong nung Nagaland Football Associaiton president, P Atuo Mezhür-i jembiba mapang pai, saisapong ajungkettsüba atema sorkar nem tenüngsang agüja liasü. Paisa, football asaya renlokdaktsütsü atema NFA-i Nagaland Premier League asentenshidaktsütsü ta metetdaktsü.
Iba sentong lapokba nüngtem nung Chief Minister’s XI aser Chief Secretary’s XI na tsüngda football exhibition match ka asaya liasü koba CM X1-i goal 3-0 agi takok angu. Lemon break sülen second half nung CM’s XI team atema Bhaichung Bhutia-i shilem agia liasü.
Iba asaya metenzükdang Nagaland State Chaplain Rev Kuzierang Thou-i sarasademtsü.