4 Buba CKT Open Penalty Shootout takokma nung tembang

Changtongya, Luroi 1 (TYO): Tsüngremmung nüngdem nung Changtongya Kaketshir Telungjemi 4 Buba CKT Open Penalty Shootout, Changtongya Town Public Ground nung Luroi 1, 2019 anogo ayongzüka liasü. Iba asayamung nung tetokteper telok ajak agi 21-i shilem agi. Tsüngsang mopung mejungaka asayartem aser tereprangertem tejangraba tulu nung longsotepa adenshir iba tetoktepba asayayonga ao. Asayaa arur Semi final asoshi Medical Ward Changtongya Town, Penli Reju Zünga Changtongya Village, Longpangtsüng Ward Changtongya Town aser Shooter Team Mokokchung anüng. Iba nungi takoker Medical Ward aser Longpangtsüng Ward-i takok ngua Final tongtet. Tatembangbuba asaya nung Longpangtsüng Ward madak Medical Ward-i takok ngua mezüng jenjang senpet sen 20,000 ajangzüktet. Iba asayamung nung Goal Keeper tajungtibabo sempet Longpangtsüng Ward nungi Prince Kumar-i agizük. Prince Kumar yagisa tawa Tuli nung ‘Under 20 Football Tournament’ nung iba kasa sempet agizüka lir.
Asayamung tenzükba sentong nung Imowaba, Asso. Pastor Home, CTBA-i moaja sarasadem aser Tiarenba Longkumer, CKT Tir-i tarur pela agizükba den asayamung lapokja liasü. CKT Sanen Luden züngsem Chubakokla-i melepzüngba mapang iba asayamung asoshi sponsors Dr. Olemjungla, Doha, Qatar aser Repasosang, SI CISF, Delhi dang pelaba shisema liasü.