4 buba Dimapur District & Inter-School TT asayamong tenzükogo

Dimapur, October 09 (TYO): Dimapur Deputy Commissioner, Kesonyu Yhome (IAS)-i tenzüktsüba sülen 4 buba Dimapur District Open & Inter-School Table Tennis Tournament Dimapur kübok State Level Stadium nung tanü Hokolbar nü nungi tenzüka asayatsü tenzükogo.
“Saisapongtsü ya nisung shia taküm nung tongtipang shilem ka lir anungji, nisung shai saisapongtsüji pei taküm nung shilem ka kümdaktsütsü ajungshir. Saisapongba ajanga pei taküm tia junga aliba den külemi, nüburtem dena tesendaktep tajung yangluteter,” ta tongti tesemdangser, Kesonyu-i metetdaktsü.
“Naga nungertem asoshi pei taküm azüoka alitsüji khuret tulu ka lir,” ta shia, saisapongba ajanga nisung shiai pei taküm tazüokba nung alitsü shizüker kechiyong asaya ajunga telatetba temzüng ozüng nung ajemdaker asayar ta pai ashi.
“Saisapongtsü alizüngji asaya nung takok angubaji masü saka shilem agiba ajanga pei taküm jenang tajungba jenjang nung ajungkettsü maongka angubaji lir,” ta tongti tesemdanger-i shisem.
Inter School tetoktepba nung school 10 nungi asayartemi shilem agiba den külemi, Open shilem nung asayar 80 shi tang toktepa shilem agiba osang jangjaogo.
Iba asayamong indang final asaya asüng, Honibar anepdang 10:00 ako nungi tenzüka asayatsü aser asayamong shibangba sentong asüng nikongtsütsü 3:00 ako nungi tenzüka agitsü sentong renema lir.
Dimapur District Table Tennis Association (DDTTA)-i ayongba asayamong shibangba sentong nung Bishnu Bhattacharjee, Tir, NPF Minority Wing tetushi tesemdanger alitsü.