4 buba Inter-School TT asayamong thinener

 

Dimapur, September 14 (TYO): Dimapur District Table Tennis Association (DDTTA)-i ayongba 4 buba Dimapur Open cum Inter-School Table Tennis asayamong asayatsü mapang thinenba osang ka DDTTA Tir, Er Chirhotho-i tanü sangdong ka ajanga metetdaktsüogo.

“Asayamong asayatsü ayongdak, State Level Indoor Stadium tajungba küma yanglushiba ajanga iba asayamong  ya taruba October ita 9-10 nü ang asayatsüsa akümer,” ta pai ashi.

“Iba asayamong nung shilem agitsü jangraba school-temi tajemba agi asayar 3 aser timba agi asayar 5 yoktsüla. Ajisüaka, asayar telok shia nung asayar 3 dang alitsü. Ano, Inter-School tetoktepba nung shilem agitsü taa senbo magitsü,” ta pai shisem.

Under-16, Under-21 tebur, tetsür aser veterans (Arishi küm 40 ser tema) shilem nung asayatsü ayongba Open shilem nung singles aser doubles tetoktepba alitsü renema lir.

Open shilem nung shilem agir kaketshir shia nungi taa sen 50 aser tanüngba asayartem nungi taa sen 100 agitsü renemogo.

Iba asayamong nung shilem agitsü shiti taruba October ita 6 nü tashi agizüktsü asoshi mapang atsülangshitsüogo aser kasaji nikongdang 3:00 ako nungi tenzüka Indoor Stadium nung agizüktsü renema lir.

Iba asyamong den sendakba osangtsüsang tali jangjashitsü jangrartemi mobile no. 9402434313 ajanga Technical Secretary, Er. Toshi mesüra mobile no. 9436003433 ajanga General Secretary den tongteprateptsü akok.