4 buba Kachari Club Football Tournament 2016 tembangogo

Dimapur, August 01 (TYO): 4 buba Kachari Club Football Tournament 2016 Dimapur kübok Kachari Sports Complex, Darogajan-Kushiabill nung tanü, Hombar nü tembangogo.
Asayamong shibangba sentong nung S I Jamir, Advisor Urban Development & MLA Dimapur AC II tetushi tesemdanger aser Ramesh Hasnu, President, Kachari Tribal Council, Nagaland tongti tesemdanger liasü.
“Kachari lanurtemi saisapongtsü sabang nung piesasa temulung lemteta shilem agitsü ayongzüker. Kachari kin ya Nagaland nung tentetba kin tarensen nung züngoka lir anungji, Kachari nisungtemi kechisarena ajunga nung peisasa ila mebilemi tongti shilem agitsü ajungshir,” ta S I Jamir-i metetdaktsü.
“Kachari kin ajunga saisapongtsü, kententsü aser sobaliba sentong balala ajanga lungjemdaktsütsüsa saisapongtsü sentong ayongba atema Kachari Sports Club dang pelaba lemsateper,” ta tongti tesemdangeria metetdaktsü.
Tanü sentong nung Bishnu Bhattacharjee, President NPF  Minority Wing Central aser par telok; Kachari Village nungi GB & Chairman aser lokti tentet balala nungi lenirtemi shilem agia liasü.
Tan asayamong nung Kachari lanurtemi tentetba football telok 16 tashi shilem agi aser Amaluma Youth Club aser Dhansiripar Youth Club nati 1 buba aser 2 buba jenjang angu.
Ano külen, Padampukhuri Youth Club-i tan asayamong nung Best Disciplined Team sempet agizüka liasü.