4 buba KDV asayamong Nov ita asayatsü

Dimapur, July 04 (TYO): 4 buba Kohima District Volleyball (KDV) asayamong taküm, 2016 küm November ita ayonga asayatsü telemtetba ka Kohima District Volleyball Association (KDVA)-i tanü, Hombar nü agiogo.
KDVA-i par General Body Meeting (GBM) senden tanü amendang ‘Transcending Through Sports’ omen nung ajemdaker tetsür aser tebur napronglai shilem agitsü KDV asayamongji November ita hopta tanabuba nung Kohima Local Ground nung asayatsü lemteta liasü.
“Iba asayamong den sentakba osang tejangja osangkaket ajanga tarutsü mapang metetdaktsütsü,” ta shia, iba asayamong nung Kohima district kübok densemba yimtsüng, block, ward aser kiyong ajunga nungi volleyball asayatsü teloktemi shilem agitsü tayongzükba olen ka KDVA-i tanü sangdong ka ajanga metetdaktsüogo.
Ano külen, KDVA tentetba 11 buba anogomong sentong taküm September ita 3 nü agitsü osang ka par telokisa metetdaktsü.
KDVA nung züngsemtsü jangrartem nungi mezüng züngsemba taasen sen 500 agitsü aser tejen züngsemtem nungi tenüng züluokshiba taasen sen 200 agitsü osang sangoktsüba den külemi, iba taasenji temonoba agi taküm September ita 3 nü tashi nung KDVA ketdangser ket tongtsütsü metetdaktsüogo.
Ano, taruba GBM senden tan July ita 27 nikongdang 3:00 ako nungi tenzüka KPC Conference Hall nung amentsü renemba aser KDVA züngsem aser par telok pusemer ajungai iba senden nung shilem agitsü tayongzükba olen ka KDVA-i metetdakja liasü.