4 buba Kohima Town Inter-Ward asayamong tenzüker

Kohima, February 01 (TYO): Nagaland PWD (R&B) Minister, Y. Vikheho Swu-i lapoktsüba sülen Kohima kübok Local Ground nung 4 buba Kohima Town Inter-Ward Men’s Football & Women’s Volleyball Tournament tanü, Hombar nü nungi asaya tenzükogo.
‘Unity & Friendship through Sports & Music’ omen nung ajemdaker NPF 9th Kohima Town Assembly Constituency-i tan asayamong ya ayonga lir.
“Naga nunger rong nung saisapongtsü sempet alir jenti lir saka parnoki bendanga magütsüba yong peipok mesütsüsüa saisapongtsüren nung shilem magitetter. Anungji, asayartemi asayamong mapang dang masü saka mapang shia saisapongtsü terenemshiba agitsü ajungshir,” ta tongti tesemdanger, Vikheho-i ajungshia ashi.
Tan amala asayamong balala ayongba ajanga Naga nunger rong nung telungjem tali alitsü imlaba olen ka tongti tesemdangerisa metetdaktsü.
“Kohima ya Nagaland yimtiba aser Naga nunger ajunga meyong lir,” ta shia, Kohima jila tali temerükba kümdaktsütsü asoshi India sorkari benokba Swachh Bharat Mission/Clean India Mission mapatong tajungba inyaktsü tajungshiba olen ka pai sangoktsü.
Kohima nung Arju den sentakba lanur sentong balala ayongba ajanga Nagaland ajunga nung alir lanurtemi sobaliba tajangzük jenti angutsü ta Vikheho-isa ayongzük.
“Tan asayamong ya NPF Party yimtenren telok asoshi dang masü saka Kohima jila nung tentetba Ward ajunga atema ayongzükba asayamong ka lir. Anungji, Ward ajunga nungi asayartemi tajungtiba agüja shilem agitsü ayongzüker,” ta Nagaland Forest, Wildlife & Climate Change Minister, Dr. Neikiesalie Nicky Kire-ia metetdaktsü.
Kohima kübok tentetba Ward 16 nungi tebur football telok 16 aser Ward 12 nungi tetsür volleyball telok 12-i tan asayamong nung shilem agitsü tenzüka lir.
Tanü mezüngbuba asaya nung Ward No.14 tebur football teloki goal 4-2 agi Ward No.2 madak takok angu aser Ward No.19 tetsür volleyball teloki points 25-16, 25-15 agi Ward No.9 madak takok ngua liasü.