4 buba Kohima Town Inter-Ward Tournament final tanü asayatsü

Kohima, February 05 (TYO): Ward No. 14 (Potterlane & Old Ministers’ Hill) aser Ward No. 16 (New Ministers’ Hill & Lerie) telok nati semifinal asaya nung takok ngua tang tasayadak 4 buba Kohima Town Inter-Ward Tournament tebur football tetoktepba final asayatsü jenjang tanü, Hokolbar nü nguogo.
Tanü Ward No. 14 telok aser Ward No. 11 (PWD) telok na tsüngda asayaba mezüngbuba semifinal asaya goal 1-1 draw nung tembangtsüsa akümba sülen takoker shimtsü asoshi tie-breaker metsütepa liasü.
Tie-breaker metsütepba sülen Ward No. 14 teloki goal 5-4 agi takok angu.
Tanü asaya tenzüker minute 50 buba nung Vikhosa Dul-i par Ward No. 14 telok asoshi goal 1 aser atazüktsüba asaya mapang tembangtsü minute 2 shi anünga alidang Velukho Rhakho-i par Ward No. 11 telok asoshi goal 1 agüja liasü.
Tanabuba semifinal asaya nung Ward No. 16 teloki goal 1-0 agi Ward No. 8 (New Market) telok tsükdaktsü.
Wanghe Kongyak-i asaya tenzüker minute 65 buba nung par Ward No. 16 telok asoshi takokba goal-ji agütsü.
Asüng, Honibar nikongdang 1:00 ako nungi tenzüka Ward No. 14 aser Ward no. 15 (AG Colony) telok na tsüngda tetsür volleyball final asayaba sülen 2:00 ako nungi tenzüka Ward No. 14 aser Ward No. 16 na tsüngda tebur football final asayatsü.
Asayamong sempet agütsüba sentong nung Kohima Deputy Commissioner, Rovilatuo Mor tetushi tejaoker alitsü.