4 Lane Highway Contractors temi inyakyim jangjashitsü

Dimapur, Monupii/May 20 (TYO): Dimapur nung 4 Lane Highway project inyaker contactor temi social media nung parnok mapa jenjang ashishia videos prokshiba aser iba dak sendakba nung telangzüba agütsüba anemogo.
Sangdong ka ajanga contractors temi, Ministry of Road Transport and Highways, Government of India-i agizüka aliba guideline aser tetuyuba dak ajemdaker maparen ajak inyakdar ta jangjashitsü.
Tawa prokshiba video nung nisung kati highway tezülen kilentzü shibangba raksaa sayuba nguogo aser kasa mapang nung nisung kati contractors temi kilentsü shibangba longpak atema lisem tamajung aser lishi meyokteper amshir ta jembiba angazükogo. Contractors temi ashiba agi, parnoki iba dak sendakba nung FIR ka benokogo.
Maneni kasa ken o nung contractor temi ashiba agi, “components ajak pei tinyaktsüyim ka lir aser kilentsü koma yanglutsü ali iba amaji yangluogo. Parnokisa, nisung senzütsüba dak alaker gari tem kilentsü tema nung mesenzütsüla, ta jangjashitsü.
Iba project nung sendaka aliba director kati ashiba agi, Purana Bazaar nungi Chumukedima tashi nung junctions/crossings tem nung kilentsü nembangba longpak ajak MORTH engineers project report aser tetuyuba dak ajemdaker inyakogo. “Kilentsü mesürai iba nembangba longpak tem tashimait masü mesera iba yangluba nung amshiba oset aser inyakyim meshidak masü. Item longpak ya nisungtem senzütsü atema yangluba lir aser main crossing tem nung MORTH engineering tetuyuba ama shidak inyakogo.
Video nung kilentzü nembangba longpak tashi mait ta aitsüba dak sendakba nung contractor temi ashiba agi, kulintsü nembangba longpak raksaba tesemtem nung gari senzütsüba tetuyuba agüja mali anungji kodaser iba longpak yagi tonne 20 dumper truck tozük aditsü.
Contractor temisa, inyakyim kar sülen anidaktsü nüngdaker ta ashi. Nüburtem shirnoksa tebilemtsü ali parnoki engineers aser contractors tem den ken o ashishiteptsü akok kechiyong parnok mapa inyakba tesem nung teti alir, ajisüaka iba melena kilentzü nung parnok mulung ka nung lishi mashi mashi indoker aser gari iba adena senzür koba tang tinyakdak maparen jangjongtsü asoshi asaa inyakba maparen ka lir. Tonne 20 dumber ka kilentzü nembangba longpak adena süira kodaser ibaji meraksatsü, ta parnoki asüngdang.
Kasa mapang nung parnoki oset jenjang temela amshir ta ashiba aitsüogo. Parnoki ashiba agi, project atema certified lap ka amenoka lir aser oset mamshi tsüngda tamasa oset jenjang tendanger. Nüburtemi tang tinyakdak maparen nung teka amteper minyakba atema sasaba parnoki lemsatepogo, koba ajanga state ajunga ajangzüktsü.
Contractor temi nüburtem dang taitsü dang maitsü contractor tem nungita yaritsü mepeshiogo.
Kasa mapang nung contractor temisa, sign boards aser tenokdangtsü tokjaka nüburtemi dry lean concrete (DLC) layer raksatsür ta ashiba den DLC junga meyanglui tatembangbuba topping minyaktettsü ta ashi. Lenmang yangluba tesem nung sign board aser tenokdangtsü dokja aliba ya reprangteta senzütsü asoshi parnokisa nüburtem dang mepeshiogo.