42buba Kohima Law College annual sports meet tenzükogo

Kohima, Metsüremi/March 08, 2022 (TYO): Mongolbar anepdang 9:00 meta Kohima College/T.M. Govt Higher Secondary School indang play ground nung 42buba Kohima Law College Annual Sports Meet 2022 lapokba sentong den repsema ‘International Women’s Day’ benjungmung agiogo. Iba sentong nung Asst. Professor Kezhokhoto Savi dena liasü, ta sangdong ka ajanga metetdaktsü.

Savi-i, alima ajunga asüngba coronavirus wara tenokdangba ajanga taoba academic session nung college-i annual sports meet masayatet aser saisapong ajanga tangatetba tajung adokdaktsür aser yimjung lidaktsür ta tamangba yur iba sports meet ayongzüktsü mapang agi sempettsüba yong asenoki Tulusang Tsüngrem nem tenüngsang agütsüdi, ta ashi.

 Tanü (08.03.2022) ya  ‘International Women’s Day’ anogomung lir aser saisaponger 150 (tetsür aser tebur) nungi tetsür timba, koba ajanga iba anogomung tali meraketdaktsür, ta pai ashi.

Tetsürtemi jenjang balala nung ajangzüktetbatem bilemtetta tanü asenoki benjungteper aser taküm iba anogomung indang omen – “BreakTheBias” nung ajemdaker asenoki tetsür aser tebur ‘bendanga’ amshiba nung tekümdangtsü osang sangoktsüdi, ta pai telok ayongzük.

Kohima Smart City Development Limited indang Senior Legal Consultant ama Savi-i, Kohima nung alir senso talisa ali kiburtem dang Kohima Smart City Development project balala nung amalitepa inyaktsü ajungshia liasü.

 Maneni, kasa sentong nung KLCEU President-i sarasadem aser Kohima Law College Students’ Union (KLCSU) indang President-i tir o jembi. Nocklei M aser Yongyo nati ken ka tena liasü.

Sports Secretary KLCSU ajanga iba meet nung shilem agirtem tenangzüktep agiba ketdangsüa liasü. Iba sülen 42buba Sports Meet ya Asst. Professor Kezhokhoto Savi-i tenzükja liasü. Savi ya Students’ Welfare, Kohima Law College indang Teacher-in-Charge lir, ta kasa sangdong ajanga ashi.