43 buba CJI menden atema Tirath Singh tenangzükba agiogo

New Delhi, December 03, 2015: Brihostibar nü New Delhi nung Rashtrapati Bhawan, Darbar Hall nung sentong ka ayongzüka Tir, Pranab Mukherjee-i ketdangsüa senior-most Supreme Court judge Justice, Tirath Singh Thakur 43buba Chief Justice of India (CJI) menden atema tenangzükba agidaktsüba noksa nung angur.

 New Delhi, December 03 (Agencies): Tanü Brihostibar nü senior Supreme Court judge Justice, Tirath Singh Thakur 43buba Chief Justice of India (CJI) atema tenangzükba agiogo.

Tanü Rashtrapati Bhavan nung sentong ka ayongzüka Tir, Pranab Mukherjee-i ketdangsüa pa nem tenangzükba agidakja liasü.

Arishi küm 63 Justice, Thakur-i Tsüngren tenüng nung tenangzükba agiogo. Durbar Hall, Rashtrapati Bhavan nung tenangzükba agiba sentong Ato kilonser Narendra Modi, par Cabinet züngsemtem aser taoba mapang Chief Justice tema densema liasü.

Iba sentong tembangba sülen Rashtrapati Bhavan nungi sangdong ka ajanga, “Tanü Rashtrapati Bhavan nung agiba sentong ka nung Justice, Tirath Singh Thakur Supreme Court of India Chief Justice atema tenangzükba agiogo. Pai Tir matsüngdang office atema tenangzükba agi,” ta metetdaktsü.

Justice Thakur-i yashi CJI menden nungi anisüngzüksang, Justice H L Dattu melenzüker. Thakur ya 1952 küm January 4 nü aso aser pai küm ka dak tema CJI memden abenba sülen 2017 January 4 nü menden nungi anisüngzüktsü.

Tanü iba sentong nung tetsü, Saraswati Thakur densema kinüngertema liasü.

Ano Cabinet Minister tem- Rajnath Singh, Sushma Swarj, Arun Jaitley, D V Sadananda Gowda, Harsh Vardhan, Smriti Irani aser BJP lenir tain, L K Advani nungera iba sentong nung denogo.

Kasa snetong nung taoba mapang Chief Justice tem- H L Dattu, K G Balakrishnan, S H Kapadia, Rajendra Mal Lodha nunger den High court balala nungi Chief Justice tem, jurists Soli Sorabjee aser Attorney General, Mukul Rohatgi nungera liasü.

Maneni Rajya Sabha nung opposition lenir, Ghulam Nabi Azad, Lok Sabha nung Congress party lenir Mallikarjun Kharge, Delhi Governor Najeeb Jung aser Delhi Chief Minister Arvind Kejriwal nungera sentong nung denogo.

Supreme Court judge inyakba mapang Justice Thakur leniba bench-i cricket ketdangsüba tentet BCCI nung temelenshi atema obendang agüja liasü.

Justice Thakur leniba bench-isa sen crore jenti nung ochimashiba ken o Saradha scam bushisüngdangtsü tuyua liasü.

Justice, Tirath Singh Thakur ya taoba mapang Jammu & Kashmir Deputy Chief Minister, Devi Das Thakur’er jabaso lir aser pa mezüng 1972 küm Pleader ka ama iba maparen nung ajemoka liasü.