48 buba ASEAN Foreign Ministers’ senden amentsü tenzüker

Kuala Lumpur, August 04 (Agencies): 48 buba ASEAN Foreign Ministers’ Meeting Malaysia kübok Kuala Lumpur yimti nung tanü Mongolbar nü nungi tenzüka amentsü tenzükogo.
ASEAN nung züngsemba Southeast Asia linük 10 nungi lenirtemi taküm 2015 tatem tashi nung ASEAN Community ka tentettsü nükjidong tulu bener tan senden nung shilem agitsü tenzüka lir.
Rongsenren, yimtenren aser sobalibaren densema sabang ajunga nung arok lokti ka tentettsü nükjidong tulu ya takok angutsüsa linük 10 züngsemba ASEAN tenteti nungdakba maparen inyakba osang bushiteta lir.
“ASEAN omen, ‘One Vision, One Identity, One Community’ asangsang nung atalokdaktsütsü asoshi tan senden ya mera tulu agir asütsü,” ta tanü senden lapokba sentong nung o jembidang, Malaysia Ato Kilonser, Najib Razak-i sangoktsü.
Par tenteti tarutsü küm 10 atema ayuba nükla, ‘ASEAN Community’s Post-2015 Vision’-a tan senden nung shilem agirtemi renema ayutsü sentong lir.
“Tan senden nung shilem agirtemi ASEAN Community tentetba ajanga asen region-i alima sabang nung tongti shilem agitettsü imlar,” ta Najib-i lemsatep.
Paisa ashiba agi, ASEAN Community takok ngua tentetba ajanga tarutsü mapang, 2050 küm tashi nungbo ASEAN ya alima ajunga nung rongsenren jenjang tajung alirtem rong nung 4 buba akümtsü aser ASEAN-i iba alizüng atongtsü asoshi nungdakba maparen inyaktsü tenzüka lir.
“Asenok rong nung taoba mapang nungi noklangben agi tajungba küma telungjem lir aser ibaji asen nükla asangsang nung ajangzüktsü tajemdakdak lung tongti lir,” ta kasa sentong nung Malaysia Foreign Minister, Anifah Aman-ia metetdaktsü.
Tanü nungi tenzüka amenba senden nung shilem agir ASEAN lenirtemi China aser United States na den külemi lungjemer par region den sentakba tongti onüktem benoka jembitsü sentong renema lir.
China o US nabo ASEAN nung züngsema mali saka par linük ana nungi lenirtemi tejaoker ama tan senden nung shilem agitsü renema lir.
Aman-i jaokba sülen, China Foreign Minister, Wang Yi-ia tan August ita 4-7 nü tashi amentsü ayongba 48 buba ASEAN senden nung shilem agitsü asoshi Malaysia tonga aoba osang jangjaogo.