48kg shilem nung tanaben tsüngteptsü: Mary Kom

Guwahati, December 09 (Agencies): India’er tetsür tsüngteper mongin, M.C. Mary Kom-i temang touzük seret 48 taret shilem nung tanaben toktepa tsüngteptsü bilemba olen ka tanü, Hokolbar nü metetdaktsüogo.
Japan nung 2020 küm asayatsü ayongba Tokyo Olympics nung seret 48 taret shilem inoksemtsü renemba osang angazükba sülen taoba mapang World Champion takokba 5 ben tashi ajangzükla, Kom-i iba shilem nung tanaben tsüngteptsü renemba osang angazükogo.
Manipur tsürla, Kom-i tetsür temang touzük seret 48 taret division tetoktepba nung world takokba ajunga agizük saka lai Olympics nung toktepa shilem agitsü nükjidong nung temang seret 51 taret nung densema tsüngtepa aru.
Temang seret tasenba nung Kom-i 2012 London Olympics bronze medal agizük saka taküm 2016 küm August ita asayaba Rio Olympics nung toktepa shilem agitsü temeten mongutettsüsa lai jenjang tamajung ajurua liasü.
Alima ajunga nung tsüngteptsü tetoktepba ketdang asür, International Boxing Federation (AIBA)-i Tokyo Games nung temang touzük seret 48 taret shilem inoksemtsü atema jembitsü tenzüka lir aser mapatongji asangsang nung inyakba ajanga Kom-i Olympic medal agizüktsü alizüng ayutsü tenzüka lir.
“Ni temang touzük seret 48 taret shilem nung tanaben densema tsüngteptsü sentong lir aser iba ajanga ni takok angutsü imlar,” ta arishi küm 33 tain Kom-i sangoktsü.