4buba Northern Angami-1 T20 March 29 nungi tenzüktsü

March 18, 2017 nü Kohima nung 4buba 10-Northern Angami-I T20 Bash Organising Committee nung ketdangsertem osangbenertem den senden amenba noksa nung angur.

Kohima, March 18 (TYO) : 4buba Northern Angami-1 T20 Bash 2017 Kohima yim Sports Association Ground, Ziekezou nung March 29, 2017 nü nungi tenzüka asayatsü aser iba asayamung nung Assembly Constituency kübok nungi team 16-i shilem agitsü.
Iba osang ya organizing committee Convenor Kethosituo Elvis Mepfhuo-i Parliamentary Secretary for State Lotteries and Music Task Force, Khriehu Liezietsu’er kidang Honibar nikongdang osangbenertem den senden ka amenba mapang metetdaktsü.
Iba asayamung ya ‘Bat for unity’ omen nung ajemdaker Khriehu Liezietsu-i sen aser teyari ajak agüja Brotherhood Group-i ayongerba lir.
Asayamung nung takok angur aser tanabuba jenjang nung takok angur teloktem nem sen lakh ka aser sen 50,000 senpettem den running trophy tem agütsüba den ano junga asayateter kija nema senpet agütsütsü.
Organising Committee nung züngsem, Keviselhou Sekhose-i, iba asayamung ya ajanga cricket asaya nung tali renloktsü aser constituency kübok aliba lanurtem tali lungjemdaktsütsü nükjidong nung ayonger, ta ashi.
Pai, iba asayamung nung asayar tajungtem shimteta asayamung tulutem nung shilem agidaktsütsü, ta shisem.
Paisa, taküm nungi tenzüka iba asayamung nung wicket timba agir aser bat asüdang runs timba yanglutetertem nem purple cap aser orange cap tem semtsütsü, ta ashi.
Tan asayamung indang stamp nung amshitsü aliba bell tem nung LED alitsü, aser ibaji state nung mezüngbuba asütsü, ta Keviselhou-i metetdaktsü.
Yaküm amshiba LED screen, koba nung asaya ka tasayadak nung score aser third umpire telemtetbatem adoka sayu, ibaji maneni amshitsü, ta paisa ashi.
League asayatem temer külen, group pezü prong nungi team tajungtiba anana quarter final-i aitsü aser ibajibo knockout yimya nung asayatsü.
Iba asayamung sentong ya Kohima Deputy Commissioner Rajesh Soundararajan tongti tesemdanger süa March 29, 2017 nü lapoktsütsü aser April 12, 2017 nü sentong shibangba mapang Kethosituo Sekhose, SDO (Sadar) tetushi tejaoker asütsü.
Asayamung nung shilem agitsü aliba telok 16 ji; P. Khel Eagles, D. Khel United, T. Khel Knights, L. Khel Upper Riders, L. Khel Lower Vikings, Kenuozou Wolves, North Block Warriors, Rakabozou/Sepfiizou Challengers, Upper Bayavii Sixers, Middle Bayavii Lions, Lower Bayavii Giants, High School Daredevils, Peraciezie Royals, Zienuobadze High Flyers, Mission Compound Dukes aser Chedema Strikers teloktem lir.
2014 küm iba asayamung mezüng tenzüka asayadang nungi High School Daredevils aser North Block Warriors team tem champion aser tanabuba jenjang nung takok angurtem süa aru.