4th Mkg inter-club badminton championship Oct 10 nungi saitsü

MDBA ketdangsürtemi Mokokchung inter-club badminton championship dak sentakba nung osangbener den senden ka mener külen tangokba noksa nung angur. Mokokchung, September 30, 2019.

Mokokchung, Sept 30 (TYO): Mokokchung District Badminton Association (MDBA)-i ayonga 4 buba Mokokchung inter-club badminton championship Oct 10 nungi 12 tashi Mokokchung Badminton Stadium nung asayatsü, ta MDBA ketdangsürtemi osangbener senden ka nung metetdaktsü.
Iba asayamung ya tongtibangsa Mokokchung district nung badminton nüngtugu kümdaktsüba den badminton club balala jenjang ajungkettsütsü, lanur nem sabang lapokja aser ajungshia tim lenmang nung anitentsü aser badminton ya taküm nung pei mapa ka ama bener odaktsütsü nükla yur taküm agi joko küm pezübuba ayongzüka akar, ta MDBA ketdangsür kadi lemsatep.
Iba asayamung ya Mokokchung district atema dang masü saka Nagaland songjen atema tongtibang ka lir, iba ya ajanga district nung badminton asaya kanga nüngtugu kümdar, association-i küm piyong sentong tapu balala ayonga arur iba asayamung ya taküm küm asoshi tatembang sentong ka amai agir, ta parnokisa ashi.
2040 tashi nungbo Mokokchung district nungi Olympic nung shilem agitettsüsa asayar adokdaktsütsü MDBA mangdang lir. Iba mangdang dak rangloker MDBA-i küm piyong asayamung balala den coaching camps aser clinic ama mapatong balala achayanga arur aser tongtibangsa tila tanurtem nem temulung balaka agütsür, kechiyong tarutsü mangdangji parnok lir, ta MDBA ketdangsürtemisa shisem.
MDBA tenzüker külen nungi district nungi asayar tajung aika adokyonga arudaki aser talisa iba ama asayamung ayongba ajanga lanurtem aika ajungmesor. Asayar tajung adokba kuli kaji tawa tembangba Nagaland Inter-District asayamung nung Mokokchung district nungi asayartemi senpet teimba ka ajangzükteta liasü, ta parnokisa kuli kar dena lemsatep.
Taküm balaka club aikadi shilem agiba ngua kanga pelar iba jagi tayongertema kanga ajungshir aser badminton asaya nüngtugu akümbaji iba yagia kuli ka sayur, ta parnokisa shisem.
Taküm iba asayamung nung Mokokchung town nungi dang masü saka temeket Chuchuyimpang, Mopungchuket, Khensa, Ungma, Lumami, Impur nungi densema club 11-i shilem agitsü, ta angazüker. Best of seven matches yimya nung asayatsü aser asaya telemsa 7; under 13 boys singles, under 15 girls singles, under 15 boys doubles, Men’s Singles, 35+ men’s doubles, veteran 95+ men’s doubles aser mixed doubles (open) nungertem alitsü. Club shiai tangalen nungi asayar teimba agi 3 tashi dang anioktsü melar. Iba asayamung shir club-i bendir sen 50,000/- aser tanabuba jenjang nem 30,000/- senpettsütsü.