5buba 10-Northern Angami-I T20 Bash: NB Warriors & LB Giants semi-final-i iogo

Kohima, December 5 (TYO): Tang tasayadak 5buba 10-Northern Angami-I T20 Bash nung tanü pei tata asaya koka North Block Warriors aser Lower Bayavü Giants pur semi-final-i iogo. Iba asayamung ya Brotherhood Group puri ayongzüka Ziekezou, Kohima Village Ground nung asayadar.
Tanü quarter final mezüngbuba asaya nung North Block Warriors puri T Khel Knights run 23 agi kokogo. Mezüng bat asüba nung NB Warriors puri over 20 nung wicket 6 out sür run 155 yanglutet. Parnok rongnungi Renjanthung-i run timtiba yanglu. Pai run 48 yanglu aser Sobin-i run 24 yanglu. Run arishiba nung T Khel Knights puri over 20 nung wicket 9 out sür run 132 dang yanglutet. Parnok rongnungi Imlibai run 49 yanglu aser Viketho-i run 23 yanglu. Kevihezo-i North Block Warriors pur atema wicket asem agi aser Renjanthung nem man of the match award agütsü.
Quarter final asaya tanabuba nung Lower Bayavü Giants puri over 20 nung wicket 6 out sür run 161 yanglutet, aser parnok rongnungi Imomenbai run 46 aser Tapitu-i run 25 ta yanglutet. Keyake-Phezoucha Pirates pur atema Kisan-i wicket ana agi. Ajisüaka run arishiba nung KP Pirates pur over 19.1 buba nung run 101 yanglur ajak out süma nung parnoki iba asaya makok. Parnok rongnungi Alkash-i run 16 yanglutet. LB Giants pur atema Teisovizo-i wicket asem agi aser Tapitu-i wicket ana agi. Tseizovizo-i wicket asem agiba den run 13 yanglutetba atema pa nem man of the match agütsü.
December 6 nü asaya yamai alitsü:
* P Khel Eagles vs Kenouzou Wolves @ 9:00AM
* RS Challengers vs Upper Bayavü Sixers @ 12:30 PM