5buba Under 15 Five Men Football Trophy tenzükogo

Asayamung tenzüktsür SSS Tir Wb. Imtidongba Jamir den mezüng match asayatsüpur Striver FC (A) aser Arsenic FC asayartem den külemi tangokba noksa nung angur.  Mokokchung, Dec 7, 2015.

Mokokchung, Dec 7 (TYO): Taküm agi joko küm pungu buba Mokokchung town nung aliba Marep Royals teloki ayongzüka arishi küm 15 tekübok alirtem (Under 15) atema ‘Five Men Football Trophy 2015’ Hombarnü nungi yangi Marepkong play ground nung tenzükogo. Tanü iba asayamung Sports Society Soyim (SSS) tir, Wb. Imtidongba Jamiri tenzüktsü.
Iba asayamung ya Mokokchung district open lir aser taküma Mokokchung town aser temeket yimtsüngtem nungi team 33 arua shilem agidaki. Iba asayamung nung takoker nem senpet sen den trophy agütsür.
Tanü iba asayamung lapokja Imtidongbai mapang tatsüka agia jembidang, saisapong ya ngujem tulu aketba luyim ka lir, anungji, “nai koba nung jangrar mesüra koba junga asayateter iba nungji na mongin akümtsü merangtsüla”, ta lanurtem dang tayongzükba ka agütsü. ‘Saisapong junga asayatetba ajanga na nüngtugu akümba den pei taküma jangratema alitsü’, ta paisa shisem.
“Iba asayamung ayongba ajanga lanur asayar tajung adokba angashia pelar aser ano maneni iba ajanga asen lima nungi tangar adoksaa state player, national aser international player aika adoktsü imlar” ta paisa moatsü.
Yaküm kümbo shilem agir telok 40 dak tema liasü, saka taküm class 9 pur tatidang aliba ajanga telok aika marutettsüsa kümadok, ta Marep Royals ketdangpur kati iba osangbener den jembidang metetdaktsü.
Marepkong Baptist Arogo CED, Temsü den temoatsü meshia sarasademer iba asayamung tenzüka liasü. Iba asayamung Dec 11 tashi asayaa amungtsü.