5G ajanga smartphone tem wangshiba khen atema agienogo

October 04, 2017 : Mobile networks atema 5G tanga dang nungi tajungba mesüra tekaraba dang masü saka langka tali asütsü. 5G shitakba tashi agi tesendaktep meyuteti alibatem ajak sendaktepa kümdaktsütsü — aser mesendakteptetbatemji meimchir atema kija jembir masü. 5G ajanga kanga tajemzük nung aliba nüburtem shirnok sendaktepteta lir item nisungtem bushia oa meyaritsü. Anungji ibai 5G amshir tali züindaktsütsü nükjidong nung adokba masü ta angatetdaktsüner.
5G nükjidongji meimchir aser osettem tsüngda tesendaktep yudaktsüsü asoshi lir. Saka iba den külemi ano nisung o nisung na tesendaktep tsütsüa maneni inyaktsü. Oset o oset na aser meimchir o oset na tsüngda tesendaktep yanglutsütsüji iba technology indang nükjidong tongtibangtibaji lir.
Technology yanglurtem Qualcomm, Ericsson aser tanga company temi 5G aser IoT (Internet of Things) tsütsü tesayuba jenti agüja lir. India nunga alima yimya sülen anidaka mezüng 5G technology amenokba sülen oset aser meimchir sendaktepa inyakyim den aotsü.
5G tensa nung smartphone temi parnok inyakyim mechioki ayutsü. Item oset ya maneni meimchir aser lipoküm na sendaktepba tsütsü tongtibang oset ka ama asütsü. Aji oda süaka, technology tasen, shishilemba tsütsü maongka aser tongtepratep tsütsü amentetba tesendakteptem kechi ajanga tajungba kümdaktsütettsü. Item ajakji smart osettem aser gadgets ajanga dang inyaktettsü.
Item maparen ajak ya smartphone ka kechi koma upgrade süa yanglur iba dakji keta lir, kechiba süra smartphone amshirtemi amshiba technology rangben agi smartphone tem nung mezüng yongi keta alibatemji dang lir.
India nung küm 10 shi smartphone tem agi market ajungmesoa arudar. Aji oda süaka taruba küm 10 nung smartphones kija agi iba market mamshitsü. Oset aser gadgets aika ajanga tesendaktep mapa inyaktsü – oset karbo ano asenok nükla nunga maliba osettem adoktsü – aser item oset ajakji 5G tashi agi amshitsü.
Anungji company kobaisa 4G nung amendaker IoT tsütsü inyaker item company tejia taruba küm ana tsüngda nungsa aritepa 5G akümtsü atema inyakteptsüla.
4G ya küm asem tsüngda nung kanga tongtibang aküm ajisüaka “IoTification” yabo 5G yakbang sür akümtsü, aser 4G ya joko küm anashidang lirbo kanga nüngdak maka akümtsü.
Anungji pei linük nung smarthphone yanglurtemi 5G maongka atema renemshia pei osettem yanglua atatsü kangasa tenüngdaktsü kümogo.