6 buba Longpok semchir telungjem mungdang ‘terajem mongjen’ dang rangloker amunger

Mokokchung, Jan 15 (TYO): Jan 15 aonung nungi “Terajem Mongjen” omen dak ajemdaker trok buba Longpok Semchir Telungjem Mungdang yangi Mokokchung town hall nung meraketa tenzükogo. Iba mungdang nung jila aser yimtsüng balala nungi Longpok semchirtem noklang aika adenshia mungdaki.
Tanü iba sentong nung onük jembir taoba Principal Higher Education Nagaland, Wb. L. Mefutiba Ao-i “tanü tensa tamangba yimsü aser sobaliba tesentaktep” nung ajemdaker jembidang, tanü tensa arogotemi ajangshiba tebilemtsü kaji, “denomination distinctive” nungi pilaa oa temeyoktep inyakyim inoksema inyakba ya lir aser iba ya arogo nung tenzükertemi pei ajung asaa inyaker. Iba ya lendong aketba tentet ka lir aser iba yimya nung dang ao nungbo tarutsü nung arogo tamendakdak nükmenji anokshidaktsütsü aser tashi maittsü, ta ashi.
Vote agütsütsübaji temzüngi melaba yimden temeten ka lir, saka tanü asen lima sen yong vote yoka achiba ya temzüng aibelenba ka dang masü saka tamangba tsütsü aser asen teyanglur Tsüngrem matsüngdanga tai lir. “Tsüngremi shinga alar tiai aitsü meyanglu, aseni dang asen tia, jenjangji yanglutet”, ta paisa ashi.
Tanü tensa asen loktiliba ajak nung ochi mashi teraksa agi sünga lir,“tamajunger dangbo majunga ta shitettsüla aser item shitetertemji arogo nung tenzükeri dang shitet”, ta ashi. Tejen Lai mapang nunga ainkartemi Chubatem mashileni aodang arüja metongshitsü. Süra tanü asen tensa loktiliba nung yamala ainkar ama sayutsüngir lir mali? ta paisa asüngdanga ashi.
Paisa tejen putu nungi tasen putu dangi ajemokba, tejen putu nung koma liasü aser tamang yimsü arur asen sobaliba melenshia aruba aser tanü tensa nüburtem/tamanger koma libalirur, itemji medema tebilemdangtsü onük tajung aika bener arua lemsatepa liasü.
Sentong nung MLA Wb. Moatoshi Longkumer, Longpok Semchir Lemtor Mungdang tir Wb. Pona, Aoli Pongen Mungdang tir Wb. Sakowati parnokia tepela o tatsütsü jembi. Longpok Semchir Telungjem Dimapur Unit-i sobaliba ken ka aten. Rev. Dr. Rongsen den temoatsü meshia sarasademer sentong tenzük aser Rev. Akanglemba den tenüngsang agüja sarasademer tembang.
Dec 16 nü sentong anepdang 10:00 ako nungi tenzüktsü aser “Terajem Mongjen” onük nung ajemdaker tsürabur Wb. Longrikabai jembitsü. Kasa sentong nung Minister Wb. Temjen Imna Along Longkumer, Ex. MLA & Senior Advocate Wb. Taka Masa Longkumer natia shilem agitsü jaoka lir.